ინტერნეტში ვირუსულად გავრცელდა ტეხასში მცხოვრები კაცის ვიდეო, რომელმაც აუქციონზე ტეილორ სვიფტის თემაზე შექმნილი და მომღერლის მიერ ხელმოწერილი გიტარა 4000 დოლარად მხოლოდ იმისთვის იყიდა, რომ ინსტრუმენტი გაენადგურებინა.
გავრცელებულ ვიდეოში ჭაღარა მამაკაცი შეძენილ გიტარას იღებს და აუდიტორიის ჟრიამულის ფონზე ჩაქუჩით ამტვრევს.
შემთხვევა ყოველწლიურ აუქციონზე მოხდა, რომელსაც არასამთავრობო ორგანიზაცია Ellis County WildGame Dinner ატარებს, რათა მხარი დაუჭიროს ახალგაზრდების აგრარულ განათლებას.
თავად სვიფტს აღნიშნულ ფაქტზე კომენტარი არ გაუკეთებია. მომღერალი ამჟამად რეკორდული „ერას ტურის” ბოლო კონცერტების სამზადისით არის დაკავებული. ტურნეს ფინალური შოუები 6-8 დეკემბერს ვანკუვერში გაიმართება.
ცოტა ხნის წინ სვიფტმა საჯაროდ დაუჭირა მხარი დემოკრატების საპრეზიდენტო კანდიდატ კამალა ჰარისს. ვიცე-პრეზიდენტისგან პასუხმაც არ დააყოვნა: „ძალიან ვამაყობ ტეილორ სვიფტის მხარდაჭერით. ის საოცარი არტისტია. ვაფასებ იმ გამბედაობას, რომელიც მან თავის კარიერაში გამოიჩინა, რომ აკეთოს ის, რაც თავად მიაჩნია სწორად.”
