სელენა გომესმა იტირა ინსტაგრამზე გამოქვეყნებულ ვიდეოში, რომელშიც ის ხალხს ჰპირდებოდა, რომ გააკეთებდა ყველაფერს, რაც კი შეეძლო, უსაბუთო მექსიკელების დასახმარებლად მას შემდეგ, რაც ტრამპის ადმინისტრაციამ აშშ-ის უსაბუთო ემიგრანტებზე თავდასხმა დაიწყო.
გამოცემა People-ის ინფორმაციით, ტეხასში დაბადებულმა მომღერალმა, რომლის ბებია-ბაბუაც თავად მექსიკელი იმიგრანტები იყვნენ, ვიდეო ინსტაგრამ სთორიზე დადო და ის უკვე წაიშალა. „ვწუხვარ” – წერდა მომღერალი ვიდეოს აღწერაში მექსიკის დროშის სიმბოლოსთან ერთად.
„ჩემი ხალხი თავდასხმის ქვეშაა, ბავშვები…,” – ამბობს ვიდეოში გომესი. „არ მესმის, ვწუხვარ. ვისურვებდი, რაიმეს გაკეთება შემეძლოს, მაგრამ არ შემიძლია. არ ვიცი, რა გავაკეთო. ყველაფერს ვეცდები, გპირდებით.”
ტრამპი საპრეზიდენტო მოვალეობის მეორე ვადით შესრულებას წინა კვირას შეუდგა და საიმიგრაციო პოლიტიკის გამკაცრების პირობა დადო. „სიენენის” ცნობით, ამ დღეებში დაახლოებით 1000 ადამიანია დაკავებული, რომლებიც ადმინისტრაციამ ეროვნული უშიშროების საფრთხედ ცნო.
32 წლის გომესი მუდმივად გამოირჩეოდა იმიგრანტების თემის მფარველობით. 2019 წელს მისი პროდიუსერობით „ნეტფლიქსზე” გამოვიდა Living Undocumented – დოკუმენტური ფილმი, რომელიც ჰყვება რვა ოჯახის ამბავს, რომლებმაც გადამღებ ჯგუფს ნება დართეს, მათი ცხოვრება გადაეღოთ, როცა ისინი ტრამპის ადმინისტრაციისგან პოტენციური დეპორტაციის წინაშე იდგნენ. იმ დროს გომესი საუბრობდა ტრამპის გუნდის სასტიკ მოპყრობაზე იმიგრანტი ოჯახების მიმართ, მათ შორის ბავშვების ოჯახებისგან განცალკევების მკაცრად გაკრიტიკებულ პოლიტიკაზე.
„ვერც კი წარმოვიდგენ, რას განიცდიან ეს ბავშვები, რომლებიც ოჯახებს დააშორეს,” – ამბობდა მომღერალი 2020 წლის თებერვალში. „ეს ტრავმა მათ მთელი ცხოვრების განმავლობაში გაჰყვებათ. ეს უბრალოდ ცხოველობაა.” 2019 წელს კი ჟურნალ TIME-ში მან დაწერა ესე თავის ბებიასა და ბაბუაზე, რომლებიც მექსიკიდან აშშ-ში ჩავიდნენ.
„1992 წელს მე აშშ-ის მოქალაქედ დავიბადე, მათი სიმამაცისა და მსხვერპლის წყალობით,” – წერდა მომღერალი. „ბოლო ოთხი ათწლეულის განმავლობაში ჩემმა ოჯახის წევრებმა ბევრი იშრომეს, რათა აშშ-ის მოქალაქეობა მოეპოვებინათ. უსაბუთო იმიგრაცია პრობლემაა, რომელზეც ყოველდღიურად ვფიქრობ და არასდროს მავიწყდება, თუ როგორი იღბლიანი ვარ, რომ ამ ქვეყანაში დავიბადე, ჩემი ოჯახისა და გარემოებების წყალობით.”
