11 იანვარს გიორგი გიგაშვილმა დუბაიში სოლო კონცერტი გამართა. კონცერტი „სტეინვეის” ორგანიზებით დუბაის ოპერაში შედგა. ქართველი პიანისტის გამოსვლას ორგანიზატორები სოციალურ ქსელში გამოეხმაურნენ და კონცერტის ვიდეოკოლაჟი გამოაქვეყნეს.
„სტეინვეი დუბაი და დუბაის ოპერა აღტაცებულია საოცარი პიანისტის, გიორგი გიგაშვილის მასპინძლობით, რომელიც არის ორტენზ ანდა-ბურლის პრიზის მფლობელი გეზა ანდას კონკურსზე და ტერენს ჯადის პრიზის ლაურეატი.
მისი მომნუსხველი შესრულება, რომელიც მოიცავდა სერგეი პროკოფიევისა და იოსებ ბარდანაშვილის ნაწარმოებებს, ნამდვილი მუსიკალური მოგზაურობა იყო. ვამაყობთ, რომ ამ განსაკუთრებული საღამოს ნაწილი ვიყავით,” – წერს „სტეინვეი დუბაი” ინსტაგრამზე.
გიორგი გიგაშვილის კონცერტი დუბაიში Steinway Prizewinner Concerts-ის ფარგლებში გაიმართა. კონცერტების ამ სერიას საფუძველი 2007 წელს ჩაეყარა და მისი მიზანია, მსოფლიოში გამორჩეული ახალგაზრდა მუსიკოსები ფართო საზოგადოებას გააცნოს.
„კონცერტებზე წარმოდგენილი არიან ახალგაზრდა მუსიკოსები, რომლებიც სპეციალურად ირჩევიან „სტეინვეის” მიერ მათი კარიერის საწყის ეტაპზე. რატომ უნდა ველოდოთ იმ დროს, როცა ყველა მათ ფრაზებს იმღერებს, იმისთვის, რომ ამ არტისტების დიდებულება შევიგრძნოთ?” – ვკითხულობთ Steinway Prizewinner Concerts-ის აღწერაში.
