კენდრიკ ლამარი 2025 წლის BET Awards-ის ტრიუმფატორი გახდა. მუსიკოსმა ხუთი ჯილდო მოიგო: წლის ალბომი GNX-ისთვის, საუკეთესო კოლაბორაცია SZA-სთან ერთად Luther-ისთვის, საუკეთესო მამაკაცი ჰიპ-ჰოპ არტისტი, წლის ვიდეო Not Like Us-ისთვის და წლის ვიდეორეჟისორი დეივ ფრისთან ტანდემისთვის.
წლის ალბომის ჯილდო ლამარს შვიდი წლის წინ აქვს მიღებული. ის და ბიონსე ერთადერთი მუსიკოსები არიან, რომელთაც აღნიშნული ნომინაცია ორჯერ აქვთ მოგებული.
GNX-მა, რომელიც 2026 წლის გრემის წლის ალბომის მთავარი კანდიდატია, BET Awards-ზე სამი გრემის მფლობელი ალბომი დაამარცხა: ბიონსეს Cowboy Carter (წლის ალბომი და საუკეთესო ქანთრი ალბომის კატეგორიები), კრის ბრაუნის 11:11 Deluxe (საუკეთესო R&B ალბომი) და Doechii-ს Alligator Bites Never Heal (საუკეთესო რეპალბომი).
SZA-მ და კრის ბრაუნმა 2-2 ჯილდო დაიმსახურეს. SZA მიყოლებით მესამედ გახდა საუკეთესო ქალი R&B/პოპ არტისტი, ასევე მოიგო წლის კოლაბორაცია კენდრეიკ ლამართან ერთად.
ბრაუნმა კი საუკეთესო მამაკაცი R&B/პოპ არტისტის წოდება მოიპოვა უკვე მერვედ, რითაც თავისივე რეკორდი გააუმჯობესა. გარდა ამისა, მისმა სიმღერამ Residuals მაყურებელთა ჯილდოც დაიმსახურა. ამ კატეგორიაში ეს ბრაუნის მეოთხე გამარჯვებაა. ამ ეტაპზე მას მხოლოდ ბიონსე უსწრებს ხუთი ჯილდოთი. ასევე ოთხი მოგება აქვს Lil Wayne-ს.
ლუთერ ვანდროსი ფანებმა ორ კატეგორიაში გაიხსენეს: გარდა იმისა, რომ Luther-მა საუკეთესო კოლაბორაციაში გაიმარჯვა, დოკუმენტური ფილმი Luther: Never Too Much საუკეთესო ფილმად დასახელდა. ეს მიყოლებით მეორე წელია, როცა ამ ნომინაციაში მუსიკალურ ლეგენდაზე შექმნილი ფილმი იმარჯვებს. გასული წლის გამარჯვებული Bob Marley: One Love გახდა.
საუკეთესო ქალი ჰიპ-ჰოპ არტისტის წოდება Doechii-ს ერგო, რომლისთვისაც ეს მისი პირველი BET Award-ია. ლეონ თომასი გახდა საუკეთესო ახალბედა არტისტი. 2024 წელს SZA-ს Snooze-ის თანაავტორობისთვის ის გრემის მფლობელიც გახდა.
Future და Metro Boomin საუკეთესო ჯგუფის ნომინაციის გამარჯვებულები გახდნენ. ეს უკვე რიგით მესამე წელია, როცა საუკეთესო ჯგუფის ჯილდოს ორი სოლო არტისტის კოლაბორაცია იმსახურებს.
ბლუ აივი კარტერი წელს უკვე მეორედ გახდა ახალგაზრდა ვარსკვლავის ჯილდოს მფლობელი. დაჯილდოების წესების თანახმად, ამ კატეგორიაში მრავალჯერადი მოგება დაშვებულია. მარსაი მარტინს ეს ჯილდო ხუთჯერ აქვს მოგებული.
დენზელ ვაშინგტონმა მეხუთედ დაიმსახურა საუკეთესო მამაკაცი მსახიობის ჯილდო. საუკეთესო მსახიობი ქალი კი პირველად სინთია ერივო გახდა.
ექვს ნომინაციაში წარდგენის მიუხედავად, დრეიკმა წლევანდელ ცერემონიაზე ვერც ერთი გამარჯვება ვერ მოიპოვა. ჯილდოს გარეშე დარჩა The Weeknd-იც, რომელიც ოთხ ნომინაციაში იყო წარდგენილი.
ცერემონიაზე პატივი მიაგეს გასულ წელს გარდაცვლილ მუსიკოსებს: ქუინსი ჯონსს, რობერტა ფლეკსა და ენჯი სტოუნს.
