მას შემდეგ, რაც ცნობილი გახდა, რომ არიანა გრანდე მონაწილეობას მიიღებს კომედიურ ფილმში Meet the Parents 4, ეს ფაქტი ფილმის ერთ-ერთმა ვარსკვლავმა რობერტ დე ნირომაც დაადასტურა.
9 ივნისს შაბათის ღამის შოუში 81 წლის დე ნირომ წარმატებით გაიარა სიცრუის დეტექტორის ტესტი. კითხვაზე, მართალია თუ არა არიანა გრანდეს კასტინგის შესახებ გავრცელებული ხმები, მან უპასუხა: – „მართალია”.
კითხვაზე, იცნობდა თუ არა არიანა გრანდეს, დე ნირომ უპასუხა, რომ პირადად არ იცნობდა, თუმცა 7-8 წლის წინ შაბათის ღამის შოუს გადაღებებზე შეხვდა შვილთან ერთად, რომელსაც არიანას გაცნობა სურდა.
„გადაღებების დროს მე მასთან არ მითანამშრომლია, თუმცა ის ამავე შოუში მონაწილეობდა. ვილაპარაკეთ, გავეცანი, ჩემს ერთ-ერთ შვილს ძალიან უნდოდა მასთან შეხვედრა და ასე წარვუდგინე.” – იხსენებს რობერტ დე ნირო.
ამ ეტაპზე უცნობია, რა როლს შეასრულებს სერიალში არიანა გრანდე, თუმცა, The Hollywood Reporter-ის ცნობით, ის „მკაცრ და ავტორიტარულ“ ქალს განასახიერებს.
მსახიობები აქტიურად საუბრობენ სერიალის ახალ ნაწილზე. ამ კვირაში კინოფესტივალზე რობერტ დე ნირო, ბენ სტილერი, ტერი პოლო და რეჟისორი ჯეი როუჩი გამოჩნდნენ, სადაც აღნიშნეს, რომ Meet the Parents-ის პირველ ნაწილს 25 წელი უსრულდება.
ბენ სტილერმა კითხვა-პასუხის სესიის დროს არიანა გრანდე შეაქო და თქვა: „ის ძალიან ნიჭიერია, მართლა ძალიან სახალისოა და რაღაც მხრივ, მთელი ფილმის მამოძრავებელი ძალაა.” – აღნიშნა ბენმა.
ფილმის მეოთხე ნაწილს ჯონ ჰამბურგი გადაიღებს, მასვე ეკუთვნის სერიალის პირველი სამი ნაწილის სცენარი. ეს ფილმი კი Meet the Fockers (2004) და Little Fockers (2010)-ის გაგრძელება.
აღსანიშნავია, რომ არიანა გრანდემ, სანამ პოპ-სუპერვარსკვლავი გახდებოდა, კარიერა Nickelodeon-ის სერიალებით, Victorious-ით და iCarly-ით დაიწყო. მან Wicked-ის კინოვერსიაში გლინდას როლისთვის ოსკარისა და ოქროს გლობუსის ნომინაციები დაიმსახურა. არიანა გრანდესთვის ეს პირველი კინო როლი იქნება ახალ ფილმში, ხოლო მიუზიკლის მეორე ნაწილის, Wicked: For Good-ის გამოსვლა კინო ეკრანებზე 21 ნოემბერს იგეგმება..
ნახეთ რობერტ დე ნიროს სტუმრობა შაბათის ღამის შოუში:
