ბენსონ ბუნმა შვეიცარიაში, მონტროს ჯაზის ფესტივალზე, სემ ფენდერის სიმღერა – Seventeen Going Under შეასრულა მას შემდეგ, რაც ბრიტანელ არტისტს ღონისძიებაში მონაწილეობაზე უარის თქმა მოუხდა.
ფენდერი 15 ივლისის საღამოს მთავარი შემსრულებელი უნდა ყოფილიყო, სადაც ასევე ბენსონ ბუნი და მარკ ამბორიც გამოდიოდნენ. თუმცა 4 ივლისს ფენდერმა სოციალურ ქსელში გამოაცხადა, რომ ერთ-ერთ ხმის იოგზე სისხლჩაქცევის გამო, ექიმებმა ორკვირიანი პაუზის აღება ურჩიეს და ამიტომაც ვერ შეძლებდა გამოსვლას.
„ძალიან დამთრგუნველია, რადგან მუდამ ვუფრთხილდები ხმას და ეს წელი კარიერის საუკეთესო ეტაპად მიმაჩნდა,“ – დაწერა მან. „თუ მაინც გამოვიდოდი სცენაზე, შესაძლოა, ხმის იოგებისათვის სერიოზული ზიანი მიმეყენებინა.“
ფესტივალის ორგანიზატორებს ფენდერის ნაცვლად სხვა შემსრულებელი არ მოუწვევიათ. შედეგად, ბუნი კონცერტის ჰედლაინერი გახდა. გამოსვლამდე მან მაყურებელს ჰკითხა: „სემ ფენდერის სანახავად ხომ არ მოსულხართ? ის ჩემთვის ძალიან შთამაგონებელი და ნიჭიერი არტისტია.“
შემდეგ ბუნმა გულწრფელად აღიარა, რომ ლაინაფში ფენდერის ადგილის დაკავება აშინებდა და ელოდა, რომ ამისგან განაწყენებული მსმენელი დახვდებოდა, თუმცა გულშემატკივრებმა სითბოთი მიიღეს. ბუნმა ფენდერის პატივსაცემად მისი 2021 წლის სინგლი – Seventeen Going Under შეასრულა.
„იმედი მაქვს, რომ ვინც სემის სანახავად იყო მოსული, ამ სიმღერის ემოციის თუნდაც ხუთ პროცენტს მიიღებს,“ – უთხრა ბუნმა აუდიტორიას. „ეს მართლაც ულამაზესი სიმღერაა.“
სემ ფენდერის ბოლო ალბომი – People Watching მიმდინარე წლის თებერვალში გამოვიდა და Seventeen Going Under-ს მოჰყვა. თუმცა მის გამოცემასაც თან ახლდა ხმის იოგების პრობლემები, რის გამოც არტისტმა შარშან რამდენიმე კონცერტი გააუქმა. „ორი სხვადასხვა ლარინგოლოგისგან მივიღე გაფრთხილება, რომ თუ ახლა ვიმღერებ, ხმას სერიოზულ და პოტენციურად შეუქცევად ზიანს მივაყენებ. ამიტომ მირჩიეს, რომ თავი შევიკავო, სანამ სრულად არ გამოვჯანმრთელდები,“ – განუცხადა ფენდერმა გულშემატკივრებს რამდენიმე თვის წინ, 2024 წლის 17 დეკემბერს.
ამჟამად ის სცენაზე დაბრუნებას 8 აგვისტოს გეგმავს. არტისტი მსმენელის წინაშე დანიის ფესტივალზე – Syd For Solen-ზე ჰედლაინერის სტატუსით წარდგება.
