26 სექტემბერს რობერტ პლანტი ახალ ალბომს გამოსცემს. Saving Grace – ეს არის ქავერ სიმღერებისგან შემდგარი პროექტი, რომელიც იმეორებს პლანტის ახალი ბენდის სახელწოდებას. ჯგუფის წევრები არიან ვოკალისტი სუზი დაიანი, ოლი ჯეფერსონი, ტონი კელსი, მეტ უორლი და ბარნი მორს-ბრაუნი. ალბომის ანონსთან ერთად ბენდმა გაავრცელა მთავარი სინგლი – Everybody’s Song, რაც ჯგუფ Low-ის 2005 წლის სიმღერის ინტერპრეტაციაა.
პლანტი Saving Grace-ის წევრებს კოვიდის პანდემიის პერიოდში, ინგლისის ერთ-ერთ სოფელში ცხოვრებისას დაუკავშირდა. ალბომი 2019 წლის აპრილიდან 2025 წლის იანვრამდე პერიოდში ჩაიწერა. Saving Grace მოიცავს სხვადასხვა არტისტისა და ბენდის კომპოზიციების ქავერებს, მათ შორის არიან: მემფის მინნი, ბობ მოსლი (Moby Grape-ის წევრი), ბლაინდ უილი ჯონსონი, The Low Anthem, მარტა სკენლანი, სარა სისკინდი და Low. 2025 წლის ზაფხულსა და შემოდგომაზე, ალბომის მხარდასაჭერად, ჯგუფი ევროპის და აშშ-ის მასშტაბით 21-დღიან ტურნეს გამართავს.
„ძალიან ბევრს ვიცინით. მგონია, ეს ჩემთვის მნიშვნელოვანია. მეც მიყვარს სიცილი,“ – ამბობს პლანტი ჯგუფზე. „მართლა ვერ ვხედავ მიზეზს, რამე ძალიან სერიოზულად აღვიქვა. არ დავღლილვარ და ეს ყველაფერი ძალიან სასიამოვნოა. ჯგუფის წევრები საოცრად თბილი ხალხია. სრულიად უნიკალური სტილით მღერიან. ვფიქრობ, ერთად მართლაც ძალიან საინტერესო სივრცეში აღმოვჩნდით.“
ბოლო ათწლეულების განმავლობაში პლანტი სხვადასხვა ჯგუფთან ერთად წარდგა სცენაზე. მათ შორის იყო Sensational Shapeshifters და, რა თქმა უნდა, ლეგენდარული Led Zeppelin.
