როკმუსიკის ცნობილმა ბენდმა – Foo Fighters-მა ახალი კლიპი, სახელწოდებით Of All People გამოუშვა. თუმცა ქართველი მსმენელისათვის ეს ნამუშევარი კიდევ უფრო მნიშვნელოვანი აღმოჩნდა: კლიპის სცენები საქართველოშია გადაღებული და პროექტზე ქართველი პროფესიონალების მრავალრიცხოვანმა გუნდმა იმუშავა.
კლიპის საპროდიუსერო სერვისი კომპანია Münchhausen Productions-მა უზრუნველყო. Münchhausen ოპერირებს როგორც საქართველოში, ისე ესტონეთში, ლატვიაში, ესპანეთსა და ფინეთში. Foo Fighters-ის კლიპის აღმასრულებელი პროდიუსერები სანდრო ალანია და შოთა ალანია არიან, ხოლო პროექტის მენეჯმენტსა და კოორდინაციას სალომე სოხაძე და ანა გელაშვილი უძღვებოდნენ.
ქართულმა გუნდმა სრულად უზრუნველყო გადასაღები მოედნის მართვა, ტექნიკური მხარე, არტ-მიმართულება და კასტინგი. რეჟისორის პირველი ასისტენტის პოზიციაზე გურამ ბაქრაძე მუშაობდა, ხოლო კამერის, განათებისა და სეტის დიზაინის დეპარტამენტები თითქმის მთლიანად ქართველი პროფესიონალებით დაკომპლექტდა.
აღსანიშნავია, რომ Münchhausen Productions-ის გუნდის როგორც წამყვანი მენეჯერული და შემოქმედებითი პოზიციები, ისე ტექნიკური გუნდი უმეტესად ქართველებით არის დაკომპლექტებული. Münchhausen Productions-ის სააგენტოს პორტფელი აერთიანებს თანამშრომლობებს ისეთ ბრენდებთან, როგორებიც არის Paramount +, Showtime და სხვა ცნობილი კინოკომპანიები და პლატფორმები.
