ქართული მუსიკის უცხოენოვან სივრცეში გადატანა მხოლოდ ტექსტის თარგმნას არ გულისხმობს, ხშირად ეს არის მცდელობა, სხვა კულტურის მსმენელს იმავე ემოციის განცდის შესაძლებლობა მისცე, რომელსაც კონკრეტული სიმღერა შენში იწვევს. სწორედ ამ იდეას ეფუძნება ანამარია ბურდულის, იგივე anman.land-ის ახალი მუსიკალური კოლაბორაცია ბრიტანელ მუსიკოს ჯიმი ჩეიმბერსთან.
ანამარიასა და ჯიმის თანამშრომლობას წინ ხანგრძლივი მეგობრობა და საერთო მუსიკალური გამოცდილება უძღვის. ისინი ერთად სწავლობდნენ The BRIT School-სა და Rose Bruford College-ში, უნივერსიტეტის პერიოდში კი ერთ მუსიკალურ კოლექტივშიც უკრავდნენ.
ანამარიას თქმით, ქართული მუსიკის ინგლისური ვერსიის იდეა მას დიდი ხნის წინ გაუჩნდა, „ზამთარია“ კი სწორედ ის სიმღერა აღმოჩნდა, რომლის თარგმნაც მას განსაკუთრებით სურდა, პირველ რიგში იმიტომ, რომ ეს მისი ერთ-ერთი საყვარელი ქართული კომპოზიციაა.
ანამარია ბურდული – anman.land – მუსიკოსი:
„მე და ჩემმა მეგობარმა, ჯიმიმ, ერთად შევქმენით ეს სიმღერა. ის ჩემი ძალიან ახლო მეგობარია და ბოლო პერიოდში ერთად მუშაობაც დავიწყეთ. ადრე ერთ ბენდში ვიყავით და ერთად ვსწავლობდით. ჯიმის ჩემი ქართველი მეგობარი შეუყვარდა და სწორედ ამიტომ ქართული სიმღერებისა და ანბანის სწავლა დაიწყო. ძალიან მოსწონდა ქართული მუსიკა და განსაკუთრებით ეს მელოდია.
დიდი ხანია, მქონდა იდეა, ეს სიმღერა მეთარგმნა, პირველ რიგში იმიტომ, რომ ეს ჩემი საყვარელი სიმღერაა და მაინტერესებდა, როგორ შეიძლებოდა მისი შინაარსის ინგლისურად გადმოცემა. მინდოდა, ჩემს ინგლისელ მეგობრებსაც გაეგოთ, როგორი შეგრძნებაა ქართული სიმღერის ემოციის გადმოტანა. ამ პროცესში ჯიმიც ძალიან დამეხმარა, რადგან მან თავად ისწავლა ქართული ტექსტი.
ჯიმი ძალიან კარგი მუსიკოსია. სიმღერა თავიდან უბრალოდ იმპროვიზაციულად დავიწყეთ, ერთად ვუკრავდით, სხვადასხვა იდეას ვცდიდით და საბოლოოდ გადავწყვიტეთ, ეს ყველაფერი ჩაგვეწერა. ასე შეიქმნა ეს ვერსია,“ – ამბობს მუსიკოსი.
ანამარია ბურდული და ჯიმი უკვე მუშაობენ სხვა ქართული სიმღერების ინგლისურ ინტერპრეტაციებზე და ასევე საკუთარ საავტორო სიმღერებსაც ქმნიან.
„ჯიმი საკუთარ მიუზიკლებსა და სიმღერებსაც წერს. ბენდშიც უკრავდა, რეპავდა კიდეც და ფოლკ-მუსიკაც ძალიან უყვარს. ამიტომ ეს თანამშრომლობა ჩვენთვის ბუნებრივად განვითარდა. ახლა ვმუშაობთ როგორც ქართულ სიმღერებზე, ისე ჩვენს საავტორო კომპოზიციებზე. რამდენიმე ქართული სიმღერა უკვე მზად გვაქვს და უახლოეს მომავალში მათაც გამოვაქვეყნებთ,“ – ამბობს anman.land.
ამ პროექტში ქართული სიმღერა იმ ახალ მუსიკალურ სივრცეში გადადის, სადაც განსხვავებული კულტურული გამოცდილება ერთმანეთს ხვდება და ნაცნობი მელოდია სრულიად ახალი ჟღერადობით იბადება.
მოისმინეთ anman.land-ისა და ჯიმი ჩეიმბერსის კოლაბორაცია „ზამთარია“
