Quemmekh-მა ახალი ტრეკი, სახელწოდებით Bender გაავრცელა, რომელიც დაანონსებული ალბომის ერთ-ერთი სინგლია. ალბომის გამოცემამდე ის ცოცხლად შესრულდება Quemmekh-ის მუსიკალურ შოუზე – Unburned, რომელიც 25 და 26 სექტემბერს Factory Tbilisi-ში გაიმართება. როგორც Quemmekh-ის სანდრო ქერაული Billboard Georgia-სთან ამბობს, სინგლის გამოქვეყნება ერთგვარი შესავალია იმ სამყაროსკენ, რომელსაც საბოლოოდ ალბომი შექმნის.
რაც შეეხება ალბომის კონცეფციას, ეს არის არტისტის მცდელობა, მინიმალისტური და მკვეთრი ფორმით შეეხოს თანამედროვე ადამიანს.
სანდრო ქერაული:
„ჩემი მუსიკა უფრო ტექსტებივით პირდაპირი, მძიმე და ამავე დროს პოპ-სენსიტიური გახდა. ალბომი არის დაძაბულობის, ცვლილების და საკუთარი თავის ხელახლა აწყობის შესახებ – პირადიდან პოლიტიკურამდე. ძალიან საინტერესო პროცესი გავიარეთ ამ ალბომის წერისას. ის იწერებოდა ორ სასტუმროში: Blueberry Nights-სა და Fabrika Tbilisi-ში, სადაც თვეების განმავლობაში ვცხოვრობდი და ვმუშაობდი ქვემეხის გუნდთან ერთად. ამავე პერიოდში გადავედით მისაქციელში, Aisi Residency-ში ალბომზე სამუშაოდ, სადაც უკვე UNBURNED-ის კონცეფციაც დაიხვეწა. ეს წელი სულ მომთაბარედ ვიცხოვრე. ახალი სივრცეები და ახალი გარემო გზადაგზა ქმნის და ამრავალფეროვნებს მუსიკალურ შემოქმედებით პროცესს – ეს ისეთი შთამაგონებელია, ალბათ სხვანაირად ვეღარც ვიმუშავებ.“
რაც შეეხება დაანონსებულ მუსიკალურ შოუს, Unburned – ეს არის Quemmekh-ისა და გურამ მაცხონაშვილის ერთობლივი პროექტი, რომელიც ხელოვნების სხვადასხვა მედიუმს მოიცავს. შოუ 20-ზე მეტ არტისტს აერთიანებს. ასევე დაანონსებულია შოუს ანონიმური მონაწილე, რომლის ვინაობაც სწორედ ლაივზე გახდება ცნობილი.
