ამერიკელმა ქანთრი მუსიკოსმა, ქერი ანდევრვუდმა პირველი საშობაო ალბომის My Gift და სადებიუტო გოსპელ ჩანაწერის My Savior შემდეგ, რიგით მეცხრე ქანთრი ნამუშევარი Denim & Rhinestones გამოუშვა. 12 ტრეკისგან შემდგარი ალბომი მოიცავს კომპოზიციებს: Velvet Heartbreak, Ghost Story, Hate My Heart, Burn, Crazy Angels და სხვებს.
აღსანიშნავია, რომ ოკლაჰომელი არტისტის წინა ჩანაწერმა My Savior საუკეთესო ტრადიციული გოსპელ ალბომის კატეგორიაში გრემის ჯილდო დაიმსახურა.
ქერი ანდერვუდმა მუსიკალური მოღვაწეობა 2005 წელს დაიწყო. ის ფართო საზოგადოებამ სატელევიზიო შოუში American Idol გამარჯვებით გაიცნო. არტისტს წარმატება სინგლმა Inside Your Heaven მოუტანა, რომლის დამსახურებითაც ის გახდა ერთადერთი ქანთრი შემსრულებელი, რომელიც ბილბორდის ცხელი ასეულის სათავეში მოხვდა. ქერის სადებიუტო, გრემის მფლობელი ალბომი Some Hearts ქანთრი მუსიკის ისტორიაში ქალი შემსრულებლის ყველაზე გაყიდვადი ნამუშევარია. მუსიკოსს, რომელსაც 8 გრემი აქვს მოპოვებული, მოღვაწეობის განმავლობაში 70 მილიონი ჩანაწერი აქვს გაყიდული. 9 ალბომის მქონე ანდერვუდს ჰოლივუდის დიდების ხეივანში ვარსკვლავიც გაუხსნეს.
