Beyoncé-ს კომპოზიციამ, სახელწოდებით Break My Soul შეერთებული შტატების მასშტაბით „პლატინის სტატუსი“ ოფიციალურად მოიპოვა. ამის აღსანიშნავად, ვარსკვლავმა ახალი კლიპი გამოაქვეყნა, რომელშიც ფანები მონაწილეობენ. უფრო კონკრეტულად კი, კლიპში ვხედავთ სოციალურ მედიაში გავრცელებულ სხვადსხვა შინაარსის სამოყვარულო ვიდეოებს, რომლებშიც სწორედ აღნიშნული სიმღერა ჟღერდება.
„BREAK MY SOUL „პლატინის სტატუსის” მფლობელია. დიდი მადლობა სიყვარულისათვის“- ვიდეოს აღწერაში ვკითხულობთ.
რაც შეეხება სიმღერის სტატუსს, ამერიკის ხმისჩამწერი კომპანიების ასოციაციის ცნობით, კომპოზიციის BREAK MY SOUL გაყიდვებმა ერთ მილიონს მიაღწია, რაც შეერთებული შტატების ტერიტორიაზე სწორედ “პლატინის სერტიფიკატის“ მოპოვებას გულისხმობს.
Break My Soul 2022 წლის ივნისში გამოქვეყნდა. სიმღერის გამოშვება წინ უძღოდა Beyoncé-ს ალბომის, Renaissance-ის გამოცემას. სიმღერამ მალევე დაიმსახურა კრიტიკოსების დადებითი შეფასებები და 2023 წლის „გრემის“ დაჯილდოების ნომინანტადაც დასახელდა. ამერიკის ხმისჩამწერმა აკადემიამ Break My Soul წარადგინა სამ ნომინაციაში: „წლის ჩანაწერი“, „წლის სიმღერა“ და „საუკეთესო საცეკვაო/ელექტრონული ჩანაწერი“.
ნახეთ Beyoncé-ს მიერ გამოქვეყნებული მუსიკალური ვიდეო:
