ადამიანს, რომელმაც ლედი გაგას ძაღლების გამსეირნებელს ესროლა და მისი ფრანგული ბულდოგები მოიპარა, 21 წლით პატიმრობა მიესაჯა.
როგორც უწყებაში ამბობენ, ლედი გაგასთან მისი კავშირი დამთხვევა იყო. დანაშაულის მოტივი მხოლოდ ფრანგული ბულდოგების მოპარვა იყო, რომელთა ღირებულებაც ათასობით დოლარს შეადგენს. დეტექტივი მიიჩნევს, რომ ქურდმა არ იცოდა, რომ ისინი მომღერალს ეკუთვნოდა.
ჯეიმს ჰოვარდ ჯექსონთან ერთად დააკავეს მისი ორი თანამზრახველიც.
პროკურორი განმარტავს, რომ დამნაშავეები ქალაქის ქუჩებში ფრანგულ ბულდოგებზე „ნადირობდნენ”. ამ დროს მათ ლედი გაგას ძაღლების გამსეირნებელი, რაიან ფიშერი დაინახეს, რომელიც მომღერლის 3 ძაღლს ასეირნებდა. ძარცვის დროს ჯექსონმა ფიშერს ესროლა და 2 ძაღლი წაიყვანა. იქვე დამონტაჟებულმა სათვალთვალო კამერამ დააფიქსირა, თუ როგორ ყვიროდა გამსეირნებელი: „მესროლეს! მიშველეთ!” როგორც ის შემდგომ სოციალურ ქსელში გამოქვეყნებულ განცხადებაში აღნიშნავს, ძალიან ახლოს იყო სიკვდილთან.
მოპარული ძაღლები რამდენიმე დღის შემდეგ დააბრუნა ქალმა, რომელიც ასევე ბრალდებულ იქნა დანაშაულში.
ლედი გაგას წარმომადგენლებს მომხდარზე კომენტარი არ გაუკეთებიათ.
