ვახტანგ ქანთარიამ ახალი სინგლი სახელწოდებით „საშობაო სიმღერები” გამოსცა. სინგლში 2 სიმღერაა შესული – „მომაბეზრე თავი, შვილო” და „ყველაფერი მოსაწყენი სწავლას ჰგავს”. ავტორის თქმით, სიმღერები კომედიურია და საბავშვო მიუზიკლის ჟანრს წარმოადგენს.
„ჩვენ გვაქვს რაღაც ტრადიციული საშობაო სიმღერები, რომლებსაც ყოველწლიურად ვუსმენთ. როცა 40-50 წელიწადი ერთსა და იმავე კომპოზიციებს უსმენ, ეს, რა თქმა უნდა, სასიამოვნოა, მაგრამ, ჩემი აზრით, საინტერესო იქნებოდა, რომ შობას ახალი სტრუქტურის სიმღერებითაც შევხვედროდით. იმას, რაც ჩემს სიმღერებშია, ეძახიან მრავალმელოდიურ სტრუქტურას – როცა ერთ კომპოზიციაში რამდენიმე მელოდიას იყენებ მოულოდნელი გადასვლებით, თუმცა ძალიან ორგანულად. ამოცანა იყო, რომ მსმენელი დაბნეულიყო ამ მრავალმელოდიური სვლით, თუმცა პარალელურად საშობაო განწყობაც შექმნილიყო. თვითონ მუსიკის ჟღერადობა – ეს საახალწლო ზარები, მაგალითად – ხელს უწყობს ამას. Რაც შეეხება შესრულებას, სიმღერები განზრახ ბავშვური ხმით არის ნამღერი, რაც ოდნავი გაქილიკებაა იმ საბავშვო კომპოზიციების, რომლებიც საქართველოში იწერება.”
ტრადიციული საშობაო კომპოზიციებისგან განსხვავებულია სიმღერების შინაარსიც. როგორც ავტორი ამბობს, მათში შეულამაზებელი რეალობაა ასახული – ქალაქის ერთი ოჯახის ერთი ბავშვის ამბავი.
„საახალწლო ჯადოსნურობის ყველაზე მეტად ბავშვებს სწამთ. ამიტომ ვფიქრობ, ყველაზე საჭირო მომენტი ამ ყველაფრის საჩვენებლად სწორედ შობაა. ეს ორი სიმღერა შინაარსობრივადაც მიბმულია ერთმანეთზე. პირველ კომპოზიციაში ასახულია ოჯახური სიტუაცია, ოჯახური დრამა, რომელშიც ბავშვი იზრდება. მეორე სიმღერაში კი ეს ბავშვი ცუდად მოქცევისთვის ისჯება და ისჯება მუსიკალურ კოლეჯში სწავლით. მე თვითონ ვსწავლობდი მუსიკალურ სასწავლებელში, სადაც ყოველ ახალ წელს კონცერტები იმართებოდა. Რომ ვაკვირდებოდი, ათიდან შვიდი ბავშვისთვის ეს სასჯელი იყო. მშობელს უნდოდა ეს და არა – ბავშვს. Რაღაც მომენტში ჩემთვისაც სასჯელი იყო, რადგან ბევრი მშობლის წინ უნდა დაუკრა, ნერვიულობ, თითქოს, გამოცდასავით არის. აი, ეს სიტუაცია გადმოვეცი იმ სახით, რომ, ვითომ, ეს არის საშობაო ქალაქი, სადაც მშობლები ბავშვებს მუსიკის სწავლებით სჯიან, განსაკუთრებით კი, სოლფეჯიოსი, რადგან სწორედ სოლფეჯიო იყო ყველაზე დიდი თავის ტკივილი, რაც კი მუსიკაში მახსენდება.
ჩემი აზრით, ეს სიმღერები თავიანთ ადგილს დაიმკვიდრებს საშობაო კომპოზიციების სიაში. განსაკუთრებით მათთვის, ვინც ისეთ ახალ წელს ეძებს, რომელიც რეალობასთანაა ახლოს და არ არის იდეალიზებული. მეორე მხრივ, ვფიქრობ, რომ მუსიკალურადაც საინტერესოა.”
მუსიკოსი საშობაო სიმღერების სერიის გაგრძელებას მომდევნო წლებშიც გეგმავს. მანამდე კი ახალ ალბომზე მუშაობს, რომელიც 2023 წლის იანვარში გამოიცემა. ისევე როგორც საშობაო სიმღერები, ახალი ალბომიც ვახტანგ ქანთარიას სახელით გამოვა და არა მისი სასცენო ფსევდონიმით (VAQO).
მოუსმინეთ ვახტანგ ქანთარიას სინგლს „საშობაო სიმღერები”
