ელვის პრესლის ქალიშვილი – ლისა მარი პრესლი 54 წლის ასაკში გარდაიცვალა. როგორც ოფიციალურ განცხადებაშია აღნიშნული, პრესლი საავადმყოფოში გარდაიცვალა მას შემდეგ, რაც სასწრაფო დახმარების ჯგუფმა მიიყვანა.
„მიმძიმს, რომ ასეთი ტრაგიკული ამბავი უნდა გაცნობოთ, ჩემმა მშვენიერმა ქალიშვილმა, ლისა მარიმ დაგვტოვა. ის ყველაზე ძლიერი და მოსიყვარულე ქალი იყო, ვისაც ვიცნობდი“ – განაცხადა პრისცილა პრესლიმ.
11 იანვარს პრესლი „ოქროს გლობუსის“ დაჯილდოებას ესწრებოდა. ცერემონიაზე ოსტინ ბატლერი ელვის პრესლიზე გადაღებულ ბიოგრაფიულ ფილმში შესრულებული მთავრი როლისათვის დააჯილდოეს.
როგორც დაჯილდოების შემდეგ ლისა მარი პრესლიმ აღნიშნა, ფილმმა მასზე დიდი შთაბეჭდილება მოახდინა – „ნამუშევარი იმდენად არაჩვეულებრივი, ზუსტი და ავთენტურია, რომ არც კი ვიცი, ჩემი დამოკიდებულება როგორ გადმოვცე“ – თქვა პრესლიმ Entertainment Tonight-თან საუბრისას.
პრესლის ოფიციალურ წარმომადგენელს მომხდართან დაკავშირებით კომენტარი ჯერ არ გაუვრცელებია.
