Backstreet Boys-ის წევრმა ნიკ კარტერმა ძმას, აარონ კარტერს ემოციური სიმღერა მიუძღვნა. კომპოზიციას სახელწოდებით Hurts to Love You კლიპიც მოჰყვება, რომელშიც ძმების ბავშვობის ვიდეოებია გამოყენებული.
„ჩვენ ყველას გვყავს ცხოვრებაში ისეთი ადამიანები, რომლებიც, არ აქვს მნიშვნელობა, რას აკეთებენ და რამდენად მძიმეა ეს ჩვენთვის, მაინც გვიყვარს,” – დაწერა მომღერალმა ინსტაგრამზე.
აარონ კარტერი, რომელიც ნივთიერებაზე დამოკიდებულებასა და ფსიქიკურ პრობლემებს ებრძოდა, 34 წლის ასაკში მოულოდნელად გარდაიცვალა.
„მტკივნეულია შენი სიყვარული, მაგრამ მე მაინც მიყვარხარ/ მთელი გულით მენატრები და იცი, რომ ყოველთვის ასე იქნება,” – ასეთია სიმღერის მისამღერი.
ძმის გარდაცვალების შემდეგ ნიკ კარტერმა აარონის ბავშვობის ფოტოები გამოაქვეყნა და დაწერა: „ჩემი გული დამსხვრეულია. მიუხედავად იმისა, რომ მე და ჩემს ძმას რთული ურთიერთობა გვქონდა, ჩემი სიყვარული მის მიმართ არასდროს გახუნებულა. მე ყოველთვის მქონდა იმედი, რომ ოდესმე როგორღაც მოინდომებდა, ჯანმრთელ გზას დასდგომოდა და იპოვიდა დახმარების ხელს, რომელიც ასე სჭირდებოდა. ხანდახან გვინდა ხოლმე, რომ ჩვენს დანაკარგში ვინმე ან რამე დავადანაშაულოთ. მაგრამ სიმართლე ისაა, რომ ნამდვილი დამნაშავე აქ დამოკიდებულება და ფსიქიკური ავადმყოფობაა.”
ნახეთ ნიკ კარტერის ვიდეო
