ნიუ იორკის „მეტროპოლიტენის ოპერა“ უკრაინაში რუსეთის შეჭრის ერთი წლის თავზე, სპეციალურ საღამოს გამართავს. კონცერტი 24 თებერვალს გაიმართება და ის ომის მსხვერპლთა გახსენებას და მათთვის პატივის მიგებას ეძღვნება.
MET-ის მუსიკალური ხელმძღვანელის, იანიკ ნეზეტ-სეგუინის დირიჟორობით, მოცარტის „რეკვიემი“ და ბეთჰოვენის „სიმფონია № 5“ შესრულდება. კონცერტზე აუდიტორიის წინაშე ასევე წარდგებიან: სოპრანო – გოლდა შულცი, მეცო-სოპრანო – ემილი დიანჯელო, უკრაინელი ტენორი – დმიტრო პოპოვი და ასევე უკრაინელი ბას-ბარიტონი – ვლადისლავ ბუიალსკი.
„მოცარტის „რეკვიემი“ ომის უდანაშაულო მსხვერპლთა გასახსენებლად შესრულდება, ხოლო ბეთჰოვენის „სიმფონია № 5“ მოსალოდნელი გამარჯვების ნიშნად გაჟღერდება“ – განაცხადა MET-ის გენერალურმა მენეჯერმა, პიტერ გელბმა.
კონცერტი რადიოს მეშვეობით გადაიცემა. ღონისძიების მხარდამჭერი „უკრაინაში გაეროს მუდმივი მისია“ და „ლინკოლნის საშემსრულებლო ხელოვნების ცენტრია“. კლასიკური მუსიკის კონცერტზე დასასწრები ბილეთების ღირებულება 50 დოლარია. მათი გაყიდვა კი პირველი თებერვლიდან დაიწყება. ბილეთებიდან მიღებული თანხა უკრაინის დასახმარებლად, საქველმოქმედო ფონდში გადაირიცხება.
