შეამჩნევდით, რომ რიანამ „სუპერ თასის“ შოუზე Lift Me Up არ შეასრულა. როგორც აღმოჩნდა, ამ სიმღერას „ოსკარისთვის“ ინახავს. Lift Me Up საუკეთესო სიმღერის ნომინაციაშია წარდგენილი კინოფილმისთვის Black Panther: Wakanda Forever და მას რიანა 12 მარტს დაჯილდოების ცერემონიაზე შეასრულებს.
ინფორმაცია რიანას „ოსკარზე“ გამოსვლის შესახებ შოუს აღმასრულებელმა პროდიუსერებმა გამოაცხადეს. თუმცა რიანა არ იქნება პირველი ადამიანი, ვინც ერთსა და იმავე წელს სუპერ თასზეც და ოსკარზეც წარდგება. 2000 წელს ეს ფილ კოლინსმა გააკეთა, მაგრამ რიანასგან განსხვავებით, „სუპერ თასის“ შოუზე ის მარტო არ იყო. Მასთან ერთად კრისტინა აგილერამ, ენრიკე ეგლესიასმა და ტონი ბრექსტონმა იმღერეს.
რიანასთვის ეს „ოსკარის“ პირველი ნომინაციაა. ამავე ნომინაციაში წარდგენილია ლედი გაგაც ფილმისთვის Top Gun: Maverick.
რიანას გამოსვლა „ოსკარზე“ მოსალოდნელი იყო. წლების განმავლობაში „ოსკარზე“ წარდგენილი სიმღერები ისეთ ვარსკვლავებს შეუსრულებიათ, როგორებიც არიან ადელი, ლედი გაგა, ელტონ ჯონი, U2. შარშანდელი შოუ კი ბიონსემ გახსნა.
რიანა 2023 წლის „ოქროს გლობუსის“ ცერემონიასაც ესწრებოდა. თუმცა ჯილდო საუკეთესო სიმღერისთვის Naatu Naatu-ს ერგო.
პირველი Black Panther-ის სიმღერა All the Stars ასევე წარდგენილი იყო „ოსკარზე“, თუმცა მაშინ კენდრიკ ლამარს და SZA-ს შოუზე არ უმღერიათ. მიზეზად ლოგისტიკისა და დროის საკითხები დასახელდა.
„ოსკარის“ 95-ე დაჯილდოება 12 მარტს „დოლბის თეატრში“ გაიმართება. საღამოს ჯიმი კიმელი გაუძღვება.
