ინგლისელმა კომპოზიტორმა ენდრიუ ლოიდ უებერმა განაცხადა, რომ ის ბროდვეის ახალი მიუზიკლის, Bad Cinderella-ს გამხსნელ წარმოდგენას ვერ დაესწრება. ამის მიზეზი მისი უფროსი ვაჟის ავადმყოფობაა – კუჭის კიბოს დიაგნოზის გამო, ის კრიტიკულ მდგომარეობაშია.
ეს განცხადება კომპოზიტორმა The Hollywood Reporter-ის პლატფორმის მეშვეობით გაავრცელა. უებერის 43 წლის ვაჟი, თავადაც გრემის ნომინანტი კომპოზიტორი და პროდიუსერი ნიკოლას ლოიდ უებერია. როგორც ენდრიუ ლოიდ უებერმა გაამხილა, მისი შვილი ბოლო 18 თვის განმავლობაში კიბოს ებრძვის და ამჟამად ის საავადმყოფოში გადაიყვანეს.
„ჩვენ ყველა ვლოცულობთ, რომ ნიკმა კიბო დაამარცხოს. ის მამაცურად იბრძვის. ამ მომენტში ჩემი ადგილი მის გვერდით არის“ – აღნიშნა ენდრიუ ლოიდ უებერმა თავის განცხადებაში.
Bad Cinderella-ს კომპოზიტორი ედრიუ ლოიდ უებერია. Წარმოდგენის ამერიკული პრემიერა ნიუ იორკის Imperial Theatre-ში 23 მარტს იგეგმება. ახალი მიუზიკლი ცნობილი ზღაპრის Cinderella-ს ინტერპრეტაციაა.
„სამწუხაროდ, ვერ შევძლებ, გამხსნელი ღამის განმავლობაში ამ არაჩვეულებრივი სამსახიობო შემადგენლობის, შემოქმედებითი გუნდისა და ორკესტრის გვერდით ვიყო“ – თქვა ოსკარის მფლობელმა კომპოზიტორმა.
უებერმა ასევე აღნიშნა, რომ შვილის ავადმყოფობის გამო, ის მიუზიკლის ბოლო რეპეტიციებსაც ვერ დაესწრო.
