Daft Punk-ის მსმენელები დუეტის საბოლოო პროდუქტს კარგად იცნობენ, ამიერიდან კი მათ ეცოდინებათ, თუ როგორ ჟღერს მათი მუსიკა სტუდიაში მუშაობისას.
The Writing of Fragments of Time ახალი რელიზია, რომელიც Daft Punk-მა 22 მარტს გამოაქვეყნა. რვაწუთიანი აუდიო სტუდიაში 10 წლის წინ არის ჩაწერილი, როცა დუეტი ამერიკელ მუსიკალურ პროდიუსერთან და ვოკალისტთან, ტოდ ედვარდსთან ერთად საერთო ტრეკზე – Fragments of Time-ზე მუშაობდა.
სიმღერა შესულია Daft Punk-ის 2013 წლის სტუდიურ ალბომში, სახელწოდებით – Random Access Memories, რომელიც უფრო ვრცელი და მრავალფეროვანი გამოცემის სახით მაისში გამოვა. The Writing of Fragments of Time დაანონსებული გამოცემიდან პირველი რელიზია. ეს არის ჩანაწერი, რომელიც სტუდიაში მუსიკოსების სამუშაო პროცესს ასახავს.
ჩანაწერი ლოს ანჯელესში მდებარე Henson Recording Studios-ში გაკეთდა და 2012 წლის 29 თებერვლით თარიღდება.
ჩანაწერი არტისტების ერთმანეთთან კომუნიკაციის ფრაგმენტებსაც მოიცავს.
„აქ არის გარკვეული ნაწილები, რომლებიც ძალიან ემოციურია“ – აღნიშნავს ტოდ ედვარდსის ჩანაწერის ბოლოს სამუშაო პროცესზე და ტრეკზე საუბრისას.
2021 წელს Billboard-თან ინტერვიუში ტოდ ედვარდსმა მუშაობის პროცესი გაიხსენა. „Daft Punk-თან ლოს ანჯელესში, ორი კვირის განმავლობაში ვმუშაობდი. მათთან ალბომის სახელწოდებით Random Access Memories ფარგლებში ვითანამშრომლე. მუშაობის Პირველი კვირა იყო, როცა დედაჩემს დავურეკე. მან ჩემს ხმაში ბედნიერება შეამჩნია და მითხრა – შენ მანდ უნდა იყო.“
Random Access Memories „გრემის“ ჯილდოს მფლობელი ალბომია. მისი ახალი გამოცემა დამატებით 35 წუთის მასალას მოიცავს, მათ შორის არის ტრეკების გამოუქვეყნებელი დემო ვერსიები, სტუდიაში მუშაობის პროცესის ამსახველი ჩანაწერები. გამოცემა ორ სხვადასხვა ფორმატში იქნება ხელმისაწვდომი – ორმაგი CD-ის და ვინილის სეტის. CD 20-გვერდიან ციფრულ ბროშურას გააერთიანებს. ვინილის სეტთან ერთად კი, მსმენელები სიმღერის Lose Yourself to Dance სპეციალურ პოსტერს და დამატებით 16-გვერდიან ბროშურას მიიღებენ. გამოცემა ასევე ხელმისაწვდომი იქნება ონლაინ სტრიმინგ ფორმატითაც.
