ჟერარდ პიკე შაკირასთან დაშორების შესახებ დუმილს არღვევს: „მინდა, ჩემი თავის ერთგული ვიყო”

ჟერარდ პიკემ დუმილი დაარღვია და პირველად ისაუბრა შაკირასთან დაშორების შესახებ.

„არ ვიტყვი. არ მსურს ამაზე საუბარი” – ასე უპასუხა ფეხბურთელმა ესპანური გამოცემა El Pais-ის კითხვას, თუ როგორ იმოქმედა მასზე დაშორებამ. ამის ნაცვლად, პიკემ შვილებზე ისაუბრა.

„ყველას აქვს პასუხისმგებლობა, გააკეთოს ის, რაც მათი შვილებისთვისაა უკეთესი. ეს ყველა მშობლის საქმეა და ეს არის ის, რაზეც ვკონცენტრირდები და რაც ჩემი, როგორც მამის, როლია.”

პიკე მედიის მიერ შაკირასთან დაშორების გაშუქების თემასაც გამოეხმაურა. „პრობლემა ისაა, თუ როგორ აღიქვამს ხალხი მოვლენებს, ან როგორ ფუთავს მათ მედია. მე ისევ ვაკეთებ იმას, რაც მინდა. მინდა, რომ ჩემი თავის ერთგული ვიყო. არ ვაპირებ ფულის დახარჯვას ჩემი იმიჯის გასუფთავებაში. ის ადამიანები, რომლებიც მიყვარს და მაღელვებს, ისედაც მიცნობენ. დანარჩენი კი არ მაინტერესებს. მე ჩემს ენერგიას ჩემს ახლობელ ადამიანებს ვახმარ და ძალიან ბედნიერი ვარ.”