2021 წელს აშერმა ლას ვეგასში წარმატებული კონცერტები გამართა, ამჯერად კი არტისტი მუსიკალურ შოუებს პარიზში აანონსებს. პირველი კონცერტი ხელოვნების ცენტრ La Seine Musicale-ში 24 სექტემბერს გაიმართება. აშერი პარიზში სულ ოთხ კონცერტს ჩაატარებს. მუსიკალური პროგრამა არტისტის 30-წლიანი კარიერიდან არაერთ ჰიტს აერთიანებს. როგორც ცნობილია, შოუები სასცენო კოსტიუმებით და სპეციალური ვიზუალური ეფექტებით იქნება გამორჩეული.
2023 წლის დასაწყისში, აშერმა თავისი ცნობილი ტურის – My Way-ის გაგრძელების შესახებ განცხადება გაავრცელა და ლას ვეგასში თხუთმეტი საკონცერტო თარიღი დააანონსა.შოუები ივნისსა და ოქტომბერში გაიმართება.
როგორც მუსიკოსმა ჟურნალ GQ-სთან ინტერვიუში განაცხადა, მას ლას ვეგასში აუდიტორიის წინაშე გამოსვლა მოსწონს. „ახლა შვილები მყავს, საკუთარი ცხოვრება მაქვს. მომწონს შესაძლებლობა, რომ რამდენიმე დღე შემიძლია სხვადასხვა ადგილებში გავმართო კონცერტები და ამ მომენტებით ვისიამოვნო“ – აღნიშნა არტისტმა. აშერმა ახლახან ახალი სინგლი სახელწოდებით GLU გამოუშვა. არტისტი აპრილში დაგეგმილი Dreamville Music Festival-ის ერთ-ერთი ჰედლაინერიც არის. ამასთან ერთად კი შესაძლოა მალე ალბომიც გამოუშვას.
