ელექტრონული მუსიკის შემსრულებელი არტისტი Four Tet და Fred again… ბრაიან ინოსთან თანამშრომლობით, მუსიკალურ ალბომს გამოუშვებენ. ალბომს Four Tet-ის ლეიბლი – Text Records 5 მაისს გამოსცემს. Four Tet-მა დაანონსებული LP, სახელწოდებით Secret Life მოიხსენია, როგორც „2023 წლის ყველაზე მშვენიერი ალბომი“. აღსანიშნავია, რომ ბრიან ინო Fred again…-ის დიდი ხნის მეგობარი და მენტორია.
„ვფიქრობ, ფრედი ჩემი მენტორიც არის. თანამედროვე მუსიკის შესახებ მისგან ძალიან ბევრი რამ ვისწავლე“ – აღნიშნა ინომ რამდენიმე თვის წინ ერთ-ერთი ინტერვიუს დროს. „როდესაც ფრედთან პირველად ვიმუშავე, მივხვდი რომ ის შესანიშნავი იყო, ეს ხომ ასეთი ნათელია. ის ძალიან მგრძნობიარე და კარგი არტისტია და ამან ჩემზე დიდი შთაბეჭდილება მოახდინა. თუმცა, ბევრი რამ არ მესმოდა რასაც აკეთებდა. გარკვეული დროის შემდეგ გავიფიქრე – ღმერთო, ეს მუსიკის შექმნის ახლებური ხედვაა. ასე რომ მისგან ნამდვილად ბევრი რამ ვისწავლე. ეს ორმხრივი ურთიერთობა აღმოჩნდა.“
Four Tet-მა ასევე აღნიშნა, რომ ალბომი ფიზიკური სახითაც გამოვა – ჩანაწერი ფირფიტაზე და CD-ზე გამოიცემა.
Secret Life მუსიკოს Fred again…-ის პირველი ახალი ალბომია მას შემდეგ, რაც 2022 წელს არტისტმა LP, სახელწოდებით Actual Life 3 გამოუშვა. ინოს ამ დროისათვის ბოლო ალბომი ForeverAndEverNoMore ასევე 2022 წელს, ოქტომბერში გამოვიდა. ეს ლეგენდარული მუსიკოსის 29-ე სტუდიური სოლო LP იყო.
Four Tet და Fred again სამკაოდ წარმატებული შემოქმედებითი ეტაპი აქვთ. არტისტები Skrillex-თან ერთად Coachella-ს ფესტივალის მეორე კვირის ე.წ. ჰედლაინერები იყვნენ. არტისტები ფესტივალის პროგრამას მუსიკალური ღონისძიების დაწყებამდე ერთი დღით ადრე დაემატნენ. ისინი Coachella-ზე გამომსვლელი არტისტების ჩამონათვალში მას შემდეგ გამოჩნდნენ, რაც ფრენკ ოუშენი ფეხის ტრავმის გამო ფესტივალის შემსრულებელთა სიას გამოეთიშა.
აღსანიშნავია, რომ ახლახან Four Tet-მა ახალი სინგლიც გამოაქვეყნა. ტრეკი, სახელწოდებით Three Drums, რომლის ხანგრძლივობა რვა წუთზე მეტია. სინგლი ასევე არტისტის ლეიბლზე – Text Records-ზე გამოიცა.
ნახეთ Four Tet-ის, Fred again…-ის და ბრაიან ინოს ერთობლივი ალბომის ყდის ე.წ. არტვორკი:
this is the artwork pic.twitter.com/QykbwxfHzV
— Four Tet (@FourTet) May 2, 2023
