ოსკარ დე ლა რენტას კაბით, კატის ყურებიანი ქუდითა და კატის მაკიაჟით Doja Cat Met Gala-ზე განსაკუთრებული ყურადღების ქვეშ აღმოჩნდა. ამ კოსტიუმით მომღერალი კარლ ლაგერფილდის საყვარელ კატას შუპეტს განასახიერებდა.
მიუხედავად იმისა, რომ Doja Cat არ ყოფილა ერთადერთი შუპეტი Met Gala-ს წითელ ხალიჩაზე (Lil Nas X-მა კატის ულვაშები გამოიყენა, ჯარედ ლეტომ კი შუპეტის ზუსტი ასლი შემოგვთავაზა), მისმა გარეგნობამ მაინც ყველაზე დიდი ინტერესი გამოიწვია.
ოსკარ დე ლა რენტას კრეატიული დირექტორების ფერნანდო გარსიასა და ლაურა კიმის თქმით, Doja-სთან თანამშრომლობა მათ მომღერლის ბილბორდის „ცხელი ასეულის” ტოპ ათეულის ჰიტის Vegas-ის შემდეგ უნდოდათ.
„მას შემდეგ სულ გვინდოდა, გვეპოვა განსაკუთრებული თანამშრომლობის მომენტი ოსკარ დე ლა რენტასთან. ის მოდის ნამდვილი It გოგონაა, ასე რომ, აღტაცებული ვართ, რომ საშუალება მოგვეცა, მის პირველ Met Gala-ს ჩაცმულობაზე გვეზრუნა. როცა წლევანდელი Met Gala-ს თემა გავიგეთ, იმ დღიდანვე ძალიან ცხადი იყო ჩვენთვის, რომ ის შუპეტი უნდა ყოფილიყო. დაახლოებით ხუთი თვე ვმუშაობდით და უამრავი ნიმუში გავაკეთეთ. დიდი დრო გვქონდა და შედეგად ასეთი წარმატებული და ლამაზი კოსტიუმი მივიღეთ.”
მიუხედავად იმისა, რომ მოდის სფეროში ორივე გამოცდილი პროფესიონალია, როგორც აღნიშნეს, ასეთი კოსტიუმი მათთვისაც პირველი იყო. „ქუდიანი კაბები ადრეც შეგვიქმნია, მაგრამ ეს პირველი ქუდიანი კაბა იყო, რომელსაც კატის ყურები ჰქონდა. ამიტომ გვინდოდა, რომ ძალიან დახვეწილი და ელეგანტური ყოფილიყო.”
