მას შემდეგ რაც მერლინ მენსონი სექსუალურ ძალადობაში დაადანაშაულეს, საჯარო სივრციდან და სოციალური მედიიდან გაუჩინარდა. ამჯერად მუსიკოსი ინსტაგრამზე დაბრუნდა და მსმენელს ახალი ალბომის გამოშვების შესახებ მიანიშნა.
„რაღაც უნდა მოგასმენინოთ“ – ასე დაასათაურა ავტორმა სოციალურ ქსელში გამოქვეყნებული შავ-თეთრი ფოტოები, რომელზეც მერლინ მენსონი მიკროფონით ხელშია გადაღებული. მან პოსტში მონიშნა თავისი ცოლი ლინდსი ოუსიჩი და მიუთითა, რომ ფოტოების სწორედ მისი გადაღებულია.
მენსონს დამატებითი ინფორმაცია არ გაუზიარებია და არ დაუზუსტებია, თუ რაზე მუშაობს, ან როდის აპირებს გამოცემას. ეს პოტენციური ჩანაწერი იქნება არტისტის პირველი ნამუშევარი მას შემდეგ, რაც არაერთმა ქალმა სექსუალურ ძალადობაში ამხილა. ამ ქალებს შორის არიან ევან რეიჩელ ვუდი, ესმე ბიანკო, ეშლი უოტერსი, ილმა გორი და სხვები.
ცოტა ხნის წინ, მენსონმა ევან რეიჩელ ვუდს ცილისწამებისთვის უჩივლა. რამდენიმე დღის წინ, ლოს ანჯელესის მოსამართლემ მუსიკოსს ამ სარჩელის მიღებაზე უარი უთხრა.
2021 წელს ვუდმა განაცხადა, რომ მერლინ მენსონმა მასზე სექსუალურად იძალადა „ვაპირებ ეს საშიში კაცი ვამხილო და სხვადასხვა ინდუსტრიას მოვუწოდო, რომ ბოიკოტი გამოუცხადონ, სანამ ის ბევრი ადამიანის ცხოვრებას დაანგრევს. მე მხარს ვუჭერ უამრავ მსხვერპლს, რომლებიც ამიერიდან აღარ გაჩუმდებიან“- განაცხადა მსახიობმა ინსტაგრამის მეშვეობით. ევან რეიჩელ ვუდუ და მერლინ მენსონი ერთმანეთს მაშინ ხვდებოდნენ, როცა მსახიობი 18 ის იყო, ხოლო მუსიკოსი – 36-ის. 2010 წელს კი წყვილი დაინიშნა. მიუხედავად იმისა, რომ მენსონმა რეიჩელ ვუდის განცხადება უარყო, მოგვიანებით მის წინააღმდეგ მსგავსი ბრალდებები არაერთმა ქალმა საჯაროდ გააჟღერა.
