Faketivists სერგი გვარჯალაძის (SirJee) ახალი მუსიკალური პროექტია. ახლახან მუსიკოსმა პროექტის ფარგლებში მულტიჟანრობრივი EP გამოუშვა. ეს არის ექსპერიმენტული სახის კოლაბორაციული EP, რომელმაც რამდენიმე ქართველი მუსიკალური ჯგუფის და მუსიკოსის ვერსია გააერთიანა.
პროექტში მონაწილეობა მიიღეს ზაზა მარჯანიშვილმა, ერეკლე გეწაძემ, გიორგი ერგემლიძემ, დუეტებმა Bad Habitz და Ellarge.
როგორც სერგი გვარჯალაძე „Billboard საქართველოსთან“ საუბრისას აღნიშნავს, იდეა სპონტანურია და ალბომიც მოკლე დროში ჩაიწერა. ძირითადი ჩანაწერი 2009 წელს ინდოეთში მოგზაურობის დროს არის გაკეთებული.
სერგი გვარჯალაძე:
„ამ დაგროვილ მასალას Lenø Records-ში პროდაქშენი გავუკეთეთ. თავიდანვე მინდოდა, რომ ეს არ ყოფილიყო სოლო ნამუშევარი, ამიტომ ტრეკები დაახლოებით ოცამდე არტისტს გავუგზავნეთ. Საბოლოოდ კი ხუთი არტისტი შევარჩიეთ და სწორედ მათი ნამუშევრები გაერთიანდა Faketivists-ის ახალ EP-ში.“
EP ექსპერიმენტული ნამუშევარია, რადგან მან მსმენელს განსხვავებული ხელწერისა და მუსიკალური მიმართულების არტისტების ხედვა წარუდგინა. როგორც სერგი გვარჯალაძე აღნიშნავს, გადაწყვეტილი აქვს, მსგავსი კონცეფციის პროექტები გააგრძელოს, ერთ ტრეკი ჩაწეროს და სხვადასხვა არტისტთან თანამშრომლობით მისი ინტერპრეტაციები მუსიკალური ალბომის სახით გამოსცეს.
Faketivists ვიზუალური პროექტიც არის. ის სამ მუსიკალურ დოკუმენტურ ვიდეოს აერთიანებს, რომლებიც ინდოეთის, ბენგალის, რაჯასტანის და კერალას შტატებშია გადაღებული.
„საბოლოოდ იდეა ის არის, რომ ნამუშევარი – იქნება ეს ტრეკი, თუ ვიდეო, ძალიან სწრაფად, პირველივე ემოციით შეიქმნას და აუდიტორიამდე ისე მივიდეს, როგორც არის ნამღერი და გადაღებული.“ – სერგი გვარჯალაძე.
