Temple Pharmacy ახალგაზრდა არტისტების ჯგუფია, რომელიც სამყაროსთან და აუდიტორიასთან ინტერაქციისათვის თავისებურ გზას ირჩევს. რთულია ამ პროექტს კონკრეტული განმარტება მოუძებნო და განსაზღვრო – ეს არის სივრცე, რომელში გაერთიანებული ხელოვანები ამბებს სხვადასხვა მედიუმის მეშვეობით ჰყვებიან. ანიმაცია, კომიქსები, მერჩენდაიზი, NFT ავატარები, ლიტერატურა და რა თქმა უნდა მუსიკა – ამ სინთეზით Temple Pharmacy რეალურ და წარმოსახვით სამყაროს ერთმანეთთან აკავშირებს.
13 ივნისს Temple Pharmacy ამავე სახელწოდების მუსიკალურ ალბომს წარადგენს. Temple Pharmacy არტისტ LUNA FLOWERS-ის პირველი ინგლისურენოვანი ალბომია. LUNA FLOWERS-ს (მაქს მაჩაიძე) ქართველი მსმენელი სხვადასხვა პროექტიდან უკვე კარგად იცნობს. მისი, როგორც არტისტის პერსონა ბევრ მიმართულებას მოიცავს – LUNA FLOWERS არის მუსიკოსი, აქტივისტი და დიზაინერი.
Temple Pharmacy-ზე LUNA FLOWERS-მა მუსიკალურ პროდიუსერ საბანასთან (ნიკა საბანაძე) ერთად იმუშავა. საბანა თვითნასწავლი არტისტია, რომელიც მუსიკას 12 წლიდან ქმნის. ხელოვანისათვის სწორედ მუსიკა იქცა საშუალებად, რომ საკუთარი თავი გამოეხატა და სტერეოტიპულ სისტემას დაპირისპირებოდა.
Temple Pharmacy 13 ტრეკს აერთიანებს. როგორც ალბომის შესახებ აღწერაში ვკითხულობთ, ის არის „ფსიქოდელური, როგორც საგალობელი“ და თბილისის ქუჩებში სპირიტუალურ მოგზაურობას ჰგავს.
