50-წლიანი კარიერის განმავლობაში ტინა ტერნერმა იმდენის მიღწევა შეძლო, რომ მისი გარდაცვალების შემდეგ სიმღერის We Are the World ვარსკვლავურ შემადგენლობაში მომღერლის მონაწილეობა ბევრს აღარ გახსენებია. თუმცა სწორედ ტერნერია პირველი ქალი, რომლის ხმაც სიმღერის ჩანაწერში ისმის. ჯამში სიმღერას 44 მომღერალი ასრულებს. ჩანაწერმა ბილბორდის ცხელი ასეულის პირველ ადგილზე 4 კვირა გაატარა და წლის საუკეთესო ჩანაწერისთვის 1986 წელს გრემი მოიგო.
We Are the World-ის ვარსკვლავური კოლექტივიდან ტერნერი მეათე გარდაცვლილი შემსრულებელი გახდა. პირველი მათგანი ვეილონ ჯენინგსი 2002 წელს გარდაიცვალა. შემდეგ იყო რეი ჩარლზი 2004 წელს და ჯუნ პოინტერი 2006-ში.
მაიკლ ჯექსონი, რომელიც ლაიონელ რიჩისთან ერთად სიმღერის თანაავტორია, 2009 წელს გარდაიცვალა. 2017 წელს ელ ჯერო, 2019 წელს ჯეიმს ინგრამი, ხოლო 2020 წელს კენი როჯერსი. 2022 წელს გარდაიცვალა ანიტა პოინტერი, 2023 წლის აპრილში – ბელაფონტე. ახლა კი – ტინა ტერნერი.
სიმღერისთვის We Are the World ჯექსონმა და რიჩიმ წლის სიმღერის ნომინაციაში გრემი მოიპოვეს. წლის ჩანაწერის ჯილდო კი სინგლის პროდიუსერს ქუინსი ჯონსს გადაეცა. მანვე მიიღო გრემი We Are the World-ის მუსიკალური ვიდეოსთვის.
