გიორგი გიგაშვილი BBC-ის ახალი თაობის არტისტების ორწლიანი პროგრამის მონაწილე გახდა.
პრესტიჟულ მუსიკალურ პროგრამაში მონაწილეობა გულისხმობს კამერული მუსიკის რამდენიმე სტუდიური ჩანაწერის გაკეთებას; კონცერტებს BBC-ის ცნობილ ორკესტრებთან – BBC Philharmonic, BBC Symphony Orchestra, BBC Concert Orchestra და სხვა; სოლო კონცერტს BBC-ის Radio 3-ის პირდაპირ ეთერში და ასევე კონცერტებს დიდი ბრიტანეთის ისეთ პრესტიჟულ საკონცერტო ადგილებში, როგორებიცაა ედინბურგი, ჩენტელჰემი და სხვა.
BBC-ის ახალი თაობის არტისტების პროგრამა სათავეს 1999 წლიდან იღებს და დღემდე მასში მონაწილეობა 90-ზე მეტ მუსიკოსსა და ჯგუფს აქვს მიღებული. Სხვადასხვა დროს პროგრამის ქართველი მონაწილეები იყვნენ ლიზა ბათიაშვილი (1999-2001), ხატია ბუნიათიშვილი (2009-2011) და მარიამ ბაწაშვილი (2017-2019). გიორგი გიგაშვილი BBC-ის ახალი თაობის არტისტი 2023-2025 წლებში იქნება.
