13 ივნისს პოლ მაკარტნის წიგნი გამოვა. 1964: Eyes of the Storm ასე ჰქვია წიგნს და მასში გაერთიანებულია მაკარტნის მიერ გადაღებული The Beatles-ის აქამდე უცნობი ფოტოები. ფოტოარქივში ჯგუფის საკონცერტო ტურნეა აღბეჭდილი.
წიგნი Amazon-ზე წინასწარი შეკვეთების სტატუსით 63.75 დოლარად იყიდება. პლატფორმის მონაცემების მიხედვით, 1964: Eyes of the Storm უკვე გაყიდვების ერთ-ერთი ლიდერია. ასევე ხელმისაწვდომი იქნება წიგნის ელექტრონული ვერსია, რომლის ფასიც 35.99 დოლარია.
1964: Eyes of the Storm-ის აღწერის მიხედვით, “ფანები The Beatles-ის მუსიკალური მოღვაწეობის ამსახველ აქამდე უცნობ ვიზუალურ მასალას გაეცნობიან. ფოტოები მაკარტნიმ 1963-1964 წლებში გადაიღო – დროის იმ მონაკვეთში, როცა The Beatles მსოფლიო სენსაციად იქცა და მუსიკის ისტორია შეცვალა.“
არტ წიგნის ფორმატის კრებული 275 ფოტოს აერთიანებს. ლონდონი, ლივერპული, პარიზი, ნიუ იორკი, ვაშინგტონი და მაიამი – ეს ის ექვსი ქალაქია, რომლებშიც პოლ მაკარტნი თავისი ჯგუფის მუსიკალურ მოგზაურობას აღბეჭდავდა.
