ცოტა ხნის წინ, ქართველმა მუსიკოსმა NEUX-მა ახალი კომპოზიცია, სახელწოდებით All I Want და მასზე გადაღებული მუსიკალური ვიდეო წარადგინა. კომპოზიცია არტისტის მუსიკალურ შემოქმედებაში მნიშვნელოვან ადგილს იკავებს. NEUX-ს ელექტრონული მუსიკის მსმენელი არც ისე ცოტა ხანია რაც იცნობს, თუმცა All I Want არის პირველი შემთხვევა, როცა აუდიტორიამ არტისტის ვოკალური მხარე გაიცნო. როგორც თავად NEUX (ნატა ბერაძე) „BIllboard საქართველოსთან“ ინტერვიუში ამბობს, ეს ნამუშევარი მისთვისაც საკუთარი ვოკალის ერთგვარი აღმოჩენის პროცესი იყო.
„ამ სიმღერამდე ჩემი მელოდიისათვის ვოკალი არასდროს დამიწერია. ეს ნამუშევარი ჩემი ხმის დაბადება იყო.“ – NEUX.
სიმღერის ტექსტი თავად NEUX-ს ეკუთვნის, ფროდაქშენზე არტისტმა Hoyah-მა იმუშავა, ხოლო მასტერინგზე ბერლინში დაფუძნებულმა სტუდია – Olo Mastering-მა.
NEUX:
„არ ვფიქრობთ, რომ უშუალოდ ეს ნამუშევარი გამორჩეულია, თუმცა გარემოებები, რამაც ის შექმნა, ნამდვილად განსაკუთრებულია. ეს არის დასავლური გავლენითა და ქართული ენისა და კულტურის სიყვარულის ერთიანობით შექმნილი ნამუშევარი.“
შეგვიძლია ვივარაუდოთ, რომ All I Want არტისტ NEUX-ის მუსიკალური შემოქმედების ახალი თავის დასაწყისია და წინ ახალი ნამუშევრებიც გველოდება, რომლებსაც ქართულ კულტურასთან ემოციური კავშირი ექნება და ამავდროულად, გლობალური მუსიკალური სივრცის ნაწილი გახდება.
NEUX-ის ახალი ნამუშევარზე საუბრისას აუცილებლად უნდა აღვნიშნოთ კომპოზიციის მუსიკალური ვიდეო. თანამედროვე სამყაროში მუსიკალური ინდუსტრია და ვიზუალური ხელოვნება ერთმანეთისაგან განუყოფელია. თუკი წლების წინ კლიპები მუსიკოსებისათვის საკუთარი ნამუშევრის პრეზენტაციის ეფექტური ფორმა იყო, დღეს მან უფრო დიდი მნიშვნელობა შეიძინა და ვიდეო არტის ერთგვარ მიმართულებადაც იქცა. ეს არის ვზიუალური კომუნიკაციის ფორმა, რომლითაც არტისტი არამხოლოდ შემოქმედებას, არამედ იდენტობას. გემოვნებას, ინტერესებსა და ღირებულებებს წარმოაჩენს.
All I Want-ის პრეზენტაცია მასზე გადაღებულ ვიდეოსთან ერთად შედგა, რომელზეც JAM PROJECT-მა იმუშავა. JAM PROJECT 2019 წელს შეიქმნა და მისი დამფუძნებლები გრიგორ დევეჯიევი და მერაბ ჭუმბურიძე არიან. ეს არ არის სტანდარტული კრეატიული სააგენტო – ეს უფრო მეტად არტისტების კომუნაა, რომელიც დამახასიათებელი ხელწერით ვიზუალური კომუნიკაციის ახალ ფორმებს გვთავაზობს. NEUX-ის ტრეკზე გადაღებული ვიდეო კი სწორედ ის ნამუშევარია, რომელიც ზუსტად გადმოსცემს სიმღერის ენერგეტიკას და ამავდროულად JAM PROJECT-ის ხელწერას ინარჩუნებს.
მინიმალისტური ესთეტიკის ვიდეოში ყველა დეტალი შთამბეჭდავ კინემატოგრაფიულ სურათს ქმნის – ფერები, რეჟისურა, საოპერატორო ნამუშევარი, მხატვრობა, კოსტიუმები, ვიზაჟი, სამსახიობო შემადგენლობა.
სიუჟეტი მორგში ვითარდება. ერთი შეხედვით საკმაოდ დამთრგუნველი ატმოსფეროს მიუხედავად, ვიდეოს ყველა დეტალი საოცრად ესთეტიკურია და სწორედ ეს იწვევს მაყურებლის ემოციურ უკუკავშირს.
JAM PROJECT:
„მთავარი შთაგონება ჩვენთვის NEUX იყო. იდეაც და ფორმაც მასთან ურთიერთობის, მასთან დაახლოების, საუბრის, მისი პიროვნების გაცნობის პროცესში დაიბადა. კომპოზიცია ძალიან ინტიმურია, ტექსტიც და ჟღერადობაც ამას აშკარად უსვამს ხაზს. ჩვენი ამოცანა იყო, ვიზუალის შექმნის დროს ეს ძალიან პირადული და სუბიექტური ატმოსფერო შეგვენარჩუნებინა, მაგრამ ამავე დროს განგვეზოგადებინა. ძალიან ნაცნობი და ერთგვარად სტერეოტიპული სიმბოლოებით შეგვექმნა რაღაც წარმოსახვითი მიკრო წესრიგი, რომელიც NEUX-ის შინაგან სამყაროს გამოხატავდა. ამავდროულად გვსურდა, ერთგვარად მეტაფორული ნამუშევარი ყოფილიყო, რომელიც პიროვნებისა და საზოგადოების ურთიერთობის მანკიერ მხარეზე მიანიშნებდა.“
მუსიკალური ვიდეოს ვიზუალი All I Want-ის ტექსტთან ერთგვარს წინააღმდეგობაშია. ტექსტში ავტორს, მიუხედავად ბარიერებისა, თავისუფალი ნება აქვს და თავადვე იღებს გადაწყვეტილებებს. მუსიკალურ ვიდეოში კი მთავარი გმირის ძალაუფლება განულებულია და სრულიად სხვებს ეკუთვნით. Სინამდვილეში სწორედ ტექსტის შინაარსისა და ვიზუალის ამ წინააღმდეგობამ შექმნა სრული სურათი და როგორც JAM PROJECT-ის დამფუძნებლები აღნიშნავენ, სათქმელიც გაამძაფრა.
ნახეთ NEUX-ის მუსიკალური ვიდეო, რომელიც გადაღებულია კომპოზიციაზე All I Want:
