Usa ქართულ მუსიკალურ სივრცეში ახალი პროექტია, რომელიც ქართველმა მუსიკოსმა და ვოკალისტმა, მარიამ უსანეთაშვილმა სადებიუტო სინგლით, სახელწოდებით Future Arc წარადგინა. მუსიკალური პროექტის ჟანრობრივი კონცეფცია მრავალფეროვანია და აერთიანებს ისეთ ელემენტებს, როგორიც არის ნეო-სოული, ბლუზი, ჯაზი, ინდი, R&B.
მარიამი 19 წლისაა და ამჟამად თბილისის სახელმწიფო კონსერვატორიაში ჯაზის ხელოვნების სპეციალობით ვოკალის განხრით სწავლობს.
როგორც მარიამ უსანეთაშვილი „Billboard საქართველოსთან“ საუბრისას ამბობს მუსიკის წერა მისთვის საკუთარი ემოციების და გარესამყაროს მიმართ დამოკიდებულების გამოხატვის საშუალებაა.
„მუსიკის მიმართ სიყვარული ყოველთვის მქონდა. ბავშვობიდან ვმღერი. სიმღერების წერა 14 წლის ასაკში დავიწყე, პირველი სიმღერა – Future Arc, რომელიც ახლა გამოვეცი 2 წლის წინ დავწერე. კომპოზიციის ტექსტი და ფროდაქშენი მთლიანად ჩემია, მასტერინგში კი მეგობარი ლადი მედულაშვილი დამეხმარა. ეს სიმღერა ერთგვარი შინაგანი დიალოგია.“
მუსიკოსის თქმით, უახლოეს მომავალში მისი გეგმები EP-ის გამოცემას უკავშირდება.
მოუსმინეთ Usa-ს კომპოზიციას სახელწოდებით – Future Arc:
