ბათუმში შავი ზღვის რიგით მე-16 ჯაზფესტივალი ჩატარდა. წელს ფესტივალს ახლად შექმნილმა სივრცემ „სთეიჯ 17-მა” უმასპინძლა.
ჯაზფესტივალი 28 ივლისს ქართული ბენდის Bedford Falls-ის კონცერტით გაიხსნა. ბენდმა თავისი რეპერტუარიდან მსმენელისთვის კარგად ნაცნობი სიმღერები შეასრულა, მათ შორის იყო სინგლები ახალი ალბომიდან „მიენდე”, რომელთა ტექსტებსაც აუდიტორია ზეპირად აჰყვა.
Bedford Falls-ის მიერ გახურებული სცენა უკვე ამერიკულმა ბენდმა Soul Train-მა დაიკავა. Ბენდმა ისეთი ცნობილი ჰიტები შეასრულა, როგორებიცაა მარვინ გეის Let’s Get It On, კურტის მეიფილდის Pusherman, სტივ უანდერის Superstition, ჯეიმს ბრაუნის Soul Power. ამ უკანასკნელს მსმენელის განსაკუთრებული ოვაციები მოჰყვა. კონცერტის მსვლელობისას ბენდის სოლისტი რეჯი საუნდერსი რამდენჯერმე ჩავიდა სცენიდან, მაყურებელს შეუერთდა და მათთან ერთად იცეკვა.
განსაკუთრებული ყურადღება დაიმსახურა ბენდის გიტარისტმა სემ სიეგენტალერმა. მან რამდენჯერმე შეასრულა სოლო პარტია და დარბაზის დიდი აპლოდისმენტები დაიმსახურა. Რეჯი საუნდერსმა კი მისი ნიჭის აღიარების ნიშნად გიტარისტს სცენაზე დაუჩოქა.
კონცერტის ბოლოს დასმულ შეკითხვაზე, თუ როგორ გრძნობდა თავს, საუნდერსმა ასე გვიპასუხა: „თავს ისე კარგად ვგრძნობ, ამაზე უკეთ რომ ვიყო, არც ვიცი, რას ვიზამდი… საოცარია, საოცარია, საოცარია. ბათუმო, მიყვარხარ!”
ჯაზფესტივალის მეორე დღე კიდევ უფრო აქტიური აღმოჩნდა. გაიზარდა მაყურებლის რაოდენობაც. მსმენელის წინაშე სცენაზე ორგზის გრემის მფლობელი მუსიკოსი და ბასისტი, ლეგენდარული მარკუს მილერი თავის ბენდთან ერთად წარდგა. მათ ჯაზის, ფანკის, როკისა და R&B-ის სინთეზით შექმნილი საავტორო კომპოზიციები შეასრულეს. კონცერტზე, რა თქმა უნდა, შესრულდა ცნობილი Tutu-ც, რომელიც მარკუს მილერმა მაილს დევისისთვის დაწერა. 1986 წელს მაილს დევისმა ამავე სახელწოდების ალბომიც გამოსცა, რომლის პროდიუსერიც ასევე მარკუს მილერი იყო.
კონცერტის დასრულების შემდეგ ხანგრძლივი აპლოდისმენტებითა და შეძახილებით მაყურებელმა მუსიკოსები ბისზე გამოიხმო. სცენაზე დაბრუნებულმა ბენდმა მილერის კიდევ ერთი ჰიტი Blast შეასრულა. ხავიერ გორდონმა კი კლავიშზე აღმოსავლური და ქართული მელოდიის სინთეზით სოლო შეასრულა, რაც საღამოს ერთ-ერთ განსაკუთრებულ და დასამახსოვრებელ მომენტად იქცა.
ჯაზფესტივალის მესამე და დასკვნით დღეს სცენაზე ამერიკული ბენდი Brooklyn Funk Essentials წარდგა. 90 წლებიდან მოყოლებული დღემდე ბენდი ნიუ-იორკის საკლუბო კულტურის განუყოფელი ნაწილია. კონცერტზე ბენდმა, რომლის სოლისტიც ელისონ ლიმერიკია, შეასრულა კომპოზიციები მათი ახალი ალბომიდან სახელწოდებით Intuition, რომელიც მაისში გამოვიდა. ჯაზის, Ჰიპო-ჰოპის, სოულისა და ფანკის ნაზავით Brooklyn Funk Essentials-მა შავი ზღვის მე-16 ფესტივალი ენერგიულად დახურა.
