ილონ მასკი ამბობს, რომ მისი პოტენციური ბრძოლა მარკ ცუკერბერგთან სოციალურ პლატფორმა ტვიტერზე გადაიცემა, რომლის ახალი სახელიც X-ია.
ორი მილიარდერი ერთმანეთთან დაპირისპირებაზე ივნისში შეთანხმდა. ცუკერბერგი აქტიურად ვარჯიშობს საბრძოლო ხელოვნებაში. წელს მან ჯიუ-ჯიცუს შეჯიბრში მონაწილეობის შესახებაც დაპოსტა.
„ცუკერბერგისა და მასკის ბრძოლა პირდაპირ ეთერში X-ზე გადაიცემა,”- დაწერა მასკმა პოსტში. „მთელი შემოსავალი მოხმარდება ქველმოქმედებას ვეტერანებისთვის.”
Zuck v Musk fight will be live-streamed on 𝕏.
— Elon Musk (@elonmusk) August 6, 2023
All proceeds will go to charity for veterans.
მანამდე მასკი ამბობდა, რომ ორთაბრძოლისთვის სიმძიმეების აწევით ემზადებოდა. „ვარჯიშის დრო არ მქონდა, ამიტომ ესენი სამსახურში მოვიტანე,” – წერდა მასკი.
შედგება თუ არა რეალურად მასკისა და ცუკერბერგის დაპირისპირება, ეს ჯერ კიდევ უცნობია. მაგრამ თუ ეს ბრძოლის შეთანხმება მხოლოდ იუმორია, შეიძლება ითქვას, რომ ამ ხუმრობამ საკმაოდ დიდი ყურადღება მიიპყრო.
ყველაფერი მასკმა დაიწყო, რომელიც გამოეხმაურა ინფორმაციას, რომ Meta აპირებდა ტვიტერის ახალი კონკურენტის გაშვებას სახელწოდებით Threads. მასკმა ირონიულად დაწერა, რომ სამყარო „ექსკლუზიურად ცუკერბერგის კონტროლის ქვეშ ექცევა”. შემდეგ კი ერთ-ერთმა მომხმარებელმა მას ხუმრობით შეახსენა ცუკერბერგის ჯიუ-ჯიცუთი გატაცების შესახებ.
„მზად ვარ რინგზე გასვლისთვის, თუ ისიც თანახმაა”, – უპასუხა კომენტარს მასკმა.
X-ისა და Meta-ს წარმომადგენლებს, ასევე Ultimate Fighting Championship-ს, რომელსაც სავარაუდო ორთაბრძოლის გასამართი ადგილი ეკუთვნის, აღნიშნულზე კომენტარი არ გაუკეთებიათ.
