3 სექტემბერს წინანდლის ფესტივალის სცენა 2 კონცერტს დაეთმობა. 12 საათზე მაყურებლის წინაშე ფესტივალის ფარგლებში მეორედ და ამჯერად სოლო კონცერტით წარდგება ახალგაზრდა პიანისტი ალექსანდრე მალოფეევი. შესრულდება ბახის, ვაინბერგის, სკრიაბინის, ვაგნერისა და ლისტის ნაწარმოებები.
მეორე კონცერტი კი 19 საათზე შედგება. კონცერტზე დაუკრავს პან-კავკასიური ორკესტრი ჯანანდრეა ნოზედას დირიჟორობით. სპეციალური სტუმრები იქნებიან: აუგუსტინ ჰადელიხი – ვიოლინო და ამიჰაი გროში – ალტი.
აუგუსტინ ჰადელიხი თანამედროვეობის ერთ-ერთი გამორჩეული მევიოლინეა. იგი ცნობილია საკუთარი ტექნიკით, ინტერპრეტაციებითა და განსხვავებული ბგერებით. ჰადელიხი მსოფლიოს მასშტაბით ისეთ ორკესტრებთან უკრავს, როგორებიცაა ბერლინის ფილარმონიული ორკესტრი, „კონცერტგებაუს” ორკესტრი, საფრანგეთის ეროვნული ორკესტრი და სხვა.
2016 წელს აუგუსტინ ჰადელიხს გადაეცა „გრემის“ ჯილდო ნომინაციაში „საუკეთესო კლასიკური ინსტრუმენტული სოლო ჩანაწერი“. 2021 წელს მუსიკოსი კიდევ ერთხელ იყო „გრემიზე“ ნომინირებული ბახის სონატებისა და პარტიტების ალბომით, რომლის შესახებაც გერმანული გამოცემა Süddeutsche Zeitung წერდა: „აუგუსტინ ჰადელიხი მსოფლიოში ერთ-ერთი ყველაზე საინტერესო მევიოლინეა. ეს ალბომი უდიდესი წარმატებაა.”
ჯულიარდის სკოლის კურსდამთავრებულმა ჰადელიხმა პირველი მნიშვნელოვანი წარმატება 2006 წელს მოიპოვა, როცა ინდიანაპოლისში საერთაშორისო სავიოლინო კონკურსის გამარჯვებული გახდა. მის მიერ მიღებულ ჯილდოებს შორის არის ასევე ევერი ფიშერის კარიერული გრანტი, ბორლეტი-ბუტონის სტიპენდია დიდ ბრიტანეთში, გაერთიანებული სამეფოს ექსეტერის უნივერსიტეტის საპატიო დოქტორის ხარისხი და გავლენიანი ჟურნალის „მუსიკალური ამერიკის“ მიერ გაცემული ჯილდო „წლის ინსტრუმენტალისტი”.
აუგუსტინ ჰადელიხი უკრავს Tarisio Trust-ის მიერ მოწოდებულ ჯუზეპე გუარნერ დელ ჯეზუს 1744 წლის ვიოლინოზე, რომელიც ცნობილია როგორც Leduc, ex Szeryng.
ამიჰაი გროში ბერლინის ფილარმონიული ორკესტრის ალტების ჯგუფის კონცერტმაისტერი და მსოფლიოში წარმატებული სოლისტი. იგი თანამშრომლობს ისეთ ცნობილ დირიჟორებთან, როგორებიც არიან: ზუბინ მეტა, ტუგან სოხიევი, კლაუს მაკელა, არიელ ცუკერმანი, დანიელ ბარენბოიმი, სერ საიმონ რეტლი და ალექსანდრ ვედერნიკოვი. გროში უკრავს საერთაშორისო სცენებზე ისეთ ორკესტრებთან, როგორებიცაა ფინეთის რადიოს სიმფონიური ორკესტრი, ვარშავის ფილარმონიული ორკესტრი, დანიის ეროვნული სიმფონიური ორკესტრი და სხვა.
2022-2023 წლის სეზონზე გროშმა დაუკრა ფერენც ლისტის კამერულ ორკესტრთან, ასევე მასიმო დი პალერმოს თეატრის ორკესტრთან ომერ მეირ ველბერის დირიჟორობით, გრან-კანარიის ფილარმონიულ ორკესტრთან ბეატრის ფერნანდესის დირიჟორობით, მანჰაიმის მუსიკალურ აკადემიასთან ერთად ინგო მეცის დირიჟორობით. წელს მას ასევე დაგეგმილი აქვს კონცერტები ბერლინის ფილარმონიულ ორკესტრთან და ვერბიეს ფესტივალზე ჟანინ იანსენთან ერთად. კამერული მუსიკის შესასრულებლად კი გროში ჰამბურგს, ციურიხს, ბერლინსა და ამსტერდამს ეწვევა.
ამიჰაი გროში 1570 წლის გასპარ-და-სალოს ალტზე უკრავს, რომელიც მას კერძო კოლექციონერმა გადასცა.
აუგუსტინ ჰადელიხი, ამიჰაი გროში და პან-კავკასიური ორკესტრი ჯანანდრეა ნოზედას დირიჟორობით წინანდლის ფესტივალზე ბეთჰოვენის, მოცარტისა და ბრამსის ნაწარმოებებს შეასრულებენ.
