2023 წელს, „წინანდლის კლასიკური მუსიკის საერთაშორისო ფესტივალი“ მეხუთე, საიუბილეო სეზონს ტრადიციულად Silknet-ის მხარდაჭერით წინანდლის ისტორიულ მამულში დახურავს.
10 სექტემბერს, წინანდლის კლასიკური მუსიკის საერთაშორისო ფესტივალის ბოლო დღეს, ორი მნიშვნელოვანი ღონისძიება გაიმართება. დღის 12:00 საათზე, მსმენელის წინაშე „ლიზა ბათიაშვილის ფონდი“ ახალგაზრდა ქართველი ხელოვანების ახალ თაობას წარმოგიდგენთ, სადაც მონაწილეობას იღებენ: ანასტასია აღლაძე – (ვიოლინო), ელენე გოგოძე – (ალტი), ანა გოგოლაძე – (ფლეიტა), თამარ დარასელია – (ფლეიტა), დავით გოგოლაძე – (კლარნეტი) და სანდრო ნებიერიძე – (ფორტეპიანო).
ღონისძიებაზე კამილ სენ-სანსის, ჟორჯ ბიზეს, მაქს ბრუხის და ედვარდ გრიგის ნაწარმოებები გაჟღერდება.
წლევანდელი ფესტივალის გამორჩეული და მრავალფეროვანი პროგრამა თერთმეტი დღის განმავლობაში კლასიკური მუსიკით დაინტერესებულ მსმენელს მასპინძლობდა. წინანდალს არაერთი უცხოელი და ქართველი კლასიკური მუსიკის ვარსკვლავი ესტუმრა.
საერთაშორისოდ აღიარებული კლასიკური მუსიკის ფესტივალის დასკვნითი ღონისძიება 10 სექტემბერს, საღამოს 19:00 საათზე, წინანდლის ამფითეატრში გაიმართება. კონცერტზე დირიჟორი კრისტოფ კონცი, ვირტუოზი მევიოლინე ლიზა ბათიაშვილი და პან-კავკასიური ახალგაზრდული ორკესტრი – ბეთჰოვენის და შუმანის ნაწარმოებებს შეასრულებენ.
ფესტივალის დასკვნითი დღის დირიჟორი კრისტოფ კონცია, ახალგაზრდა თაობის ერთ-ერთი გამორჩეული მუსიკოსი. იგი ისეთ ცნობილ ორკესტრებთან დირიჟორობს როგორიცაა: ლონდონის სიმფონიური, ვენის სახელმწიფო ოპერის, შვედეთის რადიოს სიმფონიური, რომანული შვეიცარიის, მალერის კამერული, მონრეალის მეტროპოლიტენის და ჰონგ-კონგის ფილარმონიული ორკესტრები.
კრისტოფ კონცი მეხუთე სეზონია ნოისის გერმანული კამერაკადემიის მთავარი დირიჟორია. იგი გახლავთ ისტორიული ინსტრუმენტების ცნობილი ფრანგული ანსამბლის Les Musiciens du Louvre მთავარი მოწვეული დირიჟორი. მუსიკოსი ანტონიო სტრადივარის 1707 წლის ვიოლინოზე უკრავს, რომელიც მას ავსტრიის ეროვნულმა ბანკმა გადასცა.
დაარსების დღიდან ფესტივალი ქართველი და უცხოელი კლასიკური მუსიკის არაერთ ვარსკვლავს აერთიანებს და ამ დარგის მუსიკის დაცვას, განვითარებას და პოპულარიზაციას უწყობს ხელს.
დღესასწაულად ქცეული წინანდლის ფესტივალი სილქნეტის მხარდაჭერით წელს უკვე მეხუთე საიუბილეო სეზონით სრულდება. ათი დღის განმავლობაში, დამსწრე საზოგადოებას ფესტივალი ზღაპრულ საფესტივალო გარემოს და განწყობას სთავაზობს.
