7 ნოემბერს ბარბარა სტრეიზანდი მემუარებს, სახელწოდებით My Name is Barbra გამოსცემს. ავტობიოგრაფიული წიგნი საკულტო მუსიკოსისაგან ერთადერთი სიახლე არ არის – Columbia Records და Legacy Recordings მომღერლის ორ ალბომს გამოსცემს.
EVERGREENS: Celebrating Six Decades on Columbia Records და YENTL: 40th Anniversary Deluxe Edition 27 ოქტომბერს გამოიცემა. ალბომები CD-ის და ციფრული სახით გამოვა. EVERGREENS ბარბარა სტრეიზანდის სხვა კოლექციებისაგან განსხვავებული იქნება, რადგან მასში შემავალი ტრეკები მუსიკოსის არც ერთ კომპილაციაში აქამდე არ გაერთიანებულა. როგორც ალბომის შესახებ გამოქვეყნებულ პრეს რელიზშია მითითებული, „[სიმღერები] ბარბარას მიერ არის შერჩეული და მელოდიებისა და ტექსტის მიმართ თავის ემოციურ კავშირს გადმოსცემს – თითოეულ მათგანს მის გულსა და მეხსიერებაში განსაკუთრებული ადგილი უკავია.“
YENTL: 40th Anniversary Deluxe Edition რომანტიკული მიუზიკლის, Yentl-ის საუნდტრეკების ალბომია და 15 სიმღერას აერთიანებს. 11 ტრეკი ფილმში გაჟღერებული სიმღერების დემო ვერსიებია. სტრეიზანდმა ისინი გარდაცვლილ კომპოზიტორთ მაიკლ ლეგრანდთან ერთად ჩაწერა.
