29 სექტემბერს, ლას ვეგასის პოლიციამ, ქალაქის კრიმინალურ ისტორიაში ერთ-ერთ ყველაზე ხმაურიან დანაშაულზე – თუფაქ შაკურის მკვლელობის საქმეზე ეჭვმიტანილი დააკავა. დაკავებული დუეინ დეივისია, რომელიც კალიფორნიული ბანდის წევრი იყო და Keefe D-ის სახელით იცნობდნენ. თუფაქ შაკურს 1996 წლის 7 სექტემბერს მიმავალი მანქანიდან ცეცხლსასროლი იარაღით რამდენჯერმე ესროლეს. ამ დროს რეპერი 25 წლის იყო. ახლახან დაკავებულ დეივისს ბრალი ოფიციალურად წარედგინა. ბრალი ცეცხლსასროლი იარაღით მკვლელობის მუხლს ითვალისწინებს.
დუეინ დეივისი, იგივე Keefe D ამჟამად 60 წლის არის. დეივისი ბანდის კიდევ ერთი წევრის, ორლანდო ანდერსონის ნათესავი იყო. ანდერსონს დიდი ხნის განმავლობაში მიიჩნევდნენ შაკურის მკვლელობასთან დაკავშირებულ პირად. აღსანიშნავია, რომ მკვლელობის ღამეს ანდერსონს რეპერი და მისი გარემოცვა ფიზიკურად გაუსწორდა. Შაკურის მკვლელობის შემდეგ Ანდერსონმა დანაშაული უარყო. შემთხვევიდან 2 წლის შემდეგ, 1998 წელს, იგი ბანდების დაპირისპირების დროს მოკლეს. ამ დროს ორლანდო ანდერსონი 23 წლის იყო.
ლას ვეგასის პოლიციის დეპარტამენტის წარმომადგენლების ცნობით, სამართალდამცავებმა დაკავებული დუეინ დეივისის სახლის ჩხრეკა ჩაატარეს. საცხოვრებელი შენობა ნევადაში მდებარეობს. ჩხრეკის შემდეგ პოლიციამ პრესასთან დამატებითი კომენტარი არ გააკეთა, შესაბამისად, ამ დრომდე უცნობი იყო, თუ რა მიმართულებით მიმდინარეობდა გამოძიება.
NBC News-ის ცნობით, სპეცოპერაციისას პოლიციელები მტკიცებულებას კომპიუტერში, აუდიო ჩანაწერებსა და სხვადასხვა ელექტრონულ მოწყობილობაში ეძებდნენ. შედეგად, მათ მეხსიერების ბარათი, ორი iPhone, ორი iPad და Toshiba-ს ლეპტოპი ამოიღეს.
რეპერის მკვლელობიდან თითქმის 30 წლის წელი გავიდა. Ამ დროის განმავლობაში ამ ამბავს არაერთი დოკუმენტური და საგამოძიებო ფილმი, თუ სატელევიზიო სერიალი მიეძღვნა. ამ დანაშაულმა მრავალი კონსპირაციული თეორია განაპირობა.
