გიორგი ერგემლიძემ ახალი სინგლი გამოსცა სახელწოდებით Stolen Skies. „სიმღერა ფუნდამენტურ კითხვებს წამოჭრის ჩვენი არსებობისა და იმ გზების შესახებ, რომლებსაც მივყვებით. ეს არის შეხსენება ყველა ჩვენგანისთვის, რომ შევჩერდეთ და დავფიქრდეთ არჩევანზე, რომელსაც ვაკეთებთ,” – ვკითხულობთ აღწერაში. უფრო ვრცლად კი კომპოზიციის იდეაზე Billboard საქართველოს თავად ავტორი უყვება.
გიორგი ერგემლიძე:
„მგონია, რომ ახლა, როგორც არასდროს, ისე აქვთ ადამიანებს ეგზისტენციალური კრიზისი იმიტომ, რომ სრული ქაოსია ინფორმაციული. Სადაც არ უნდა წახვიდე, ეს ინფორმაცია, როგორც ცუნამი და ვულკანი, ასე მოდის – ვერ გაექცევი. ადამიანს კი ხანდახან განმარტოება სჭირდება. მერე იწყება ფიქრები, რომ „საერთოდ რა ხდება? ამ სისტემის ჭანჭიკი ვარ?” კიდევ არის ის, რომ რასაც ვაკვირდები, ადამიანების უმრავლესობა აკეთებს იმას, რაც არ მოსწონს. უწევს ამის კეთება. დადიან სამსახურში და დარწმუნებული ვარ, ყველას აქვს ეს კითხვა, რომ, „აი, რას ვაკეთებ ახლა? მომწონს ეს, რასაც ვაკეთებ? Რომ წამოვიდე?” და მერე უკვე შიში მოდის: „მერე რას ვიზამ? Რა გავაკეთო?” აი, ასეთი ფიქრები.
თუმცა ეს იდეა თავიდანვე არ მქონია. ზოგადად, თითქმის ყოველთვის ჯერ მელოდიის ხაზს ვწერ. მიკროფონთან ვდგები და რაც მომდის მელოდია, ვღიღინებ გაურკვეველი სიტყვებით. და მერე უკვე, აი, ძალიან საინტერესო ფაქტი რაც არის მანდ – მერე შენს თავს ხომ უსმენ, შენივე თავი გეუბნება, იქ რას ამბობ. ამ გაურკვეველ ღიღინში გესმის რაღაც სიტყვები და უკვე ქვეცნობიერი გაძლევს მთავარ კვანძურ სიტყვებს. ეს ძალიან მედიტაციური და უცნაური პროცესია ჩემთვის, რომ სიმღერა თვითონ გაწერინებს თავის თავს.
Სიმღერის შექმნა 4 თვის წინ დავიწყე. Რაღაც პერიოდი არ მომწონდა, წაშლაც მინდოდა, მაგრამ მერე საბოლოო ჯამი მივუბრუნდი. თან საინტერესო ფაქტი იყო, რომ მუშაობის დროს კატები ჩხუბობდნენ გარეთ და საოცარი ხმები ისმოდა, მუშაობაშიც მიშლიდა ხელს. მერე კი ვიფიქრე, რომ ავდგები და ჩავიწერ ამ კატების ხმას. ჩავწერე, დავსემპლე და ახლა მთავარი მელოდიური ხაზი, რაც თავიდან მიდის ინტროში, არის სწორედ კატის ხმა.
სათაურს რაც შეეხება, გულახდილი ვიქნები და სიმღერა რომ მზად მქონდა, არ ვიცოდი, რა დამერქმია. ძალიან ბევრი ვერსია მქონდა და არ ვიყავი დარწმუნებული. და ბოლოს ChatGPT-ის ვკითხე. Ჩავუგდე მთლიანი ტექსტი და ვკითხე, რა დავარქვა-მეთქი. რამდენიმე ვერსია მომცა და ერთ-ერთი იყო Stolen Skies. მომეწონა და ავირჩიე. ეს სახელი მე შეიძლება არასდროს მომსვლოდა აზრად იმიტომ, რომ ეგეთი სიტყვები არ არის ტექსტში. ასე რომ, მგონია, რომ დღეს ძალიან გეხმარება ტექნოლოგიები. ”
უახლოეს მომავალში მუსიკოსი სიმღერაზე ვიდეოკლიპის გადაღებას გეგმავს. დეკემბერში კი უკვე EP-ის გამოსცემს, სადაც ორ ახალ კომპოზიციასთან ერთად Stolen Skies და ივლისში გამოცემული სინგლი Echoes of the Dreamer შევა. მანამდე კი, 27 ოქტომბერს, ამერიკაში გამოვა ფილმი სახელწოდებით The Hive, სადაც გიორგი ერგემლიძის სიმღერა Wrong With Now არის გამოყენებული.
