„გაფრინდა ჩემი ლამაზი გოგო… აიარა ოქროყანის აღმართი… დატოვა მხოლოდ ბოლო სურვილი – საქართველოში დაბრუნება თუნდაც სიკვდილის შემდეგ…“ – წერს ჟურნალისტი მაკა რაზმაძე ფეისბუქ გვერდზე მომღერალ ინგა ფერაძეზე.
მომღერალი ინგა ფერაძე ემიგრაციაში იმყოფებოდა. იგი ბრიუსელში სოციალურ ბინაში ცხოვრობდა და საქართველოში დაბრუნებაზე ოცნებობდა.
ინგა ფერაძე 1970-80-იან წლებში საქართველოში დიდი პოპულარობით სარგებლობდა.
ინგა ფერაძე საქართველოს საზღვრებს გარეთაც კონცერტებს ხშირად მართავდა.
ჟურნალისტი ირაკლი კორძაია ინგა ფერაძის შესახებ დოკუმენტურ ფილმზე მუშაობს. როგორც ჟურნალისტი სოციალურ ქსელში წერს, ფილმის შავი მასალა უკვე მზად არის. ავტორი დოკუმენტურ ფილმს ასე ახასიათებს „ეს არის ფილმი აბსოლუტურ მარტოობაზე…”
რამდენიმე თვის წინ მომღერალ ინგა ფერაძის საქართველოში დასაბრუნებლად, მანანა მენაბდეს ინიციატივით საქველმოქმედო კამპანია დაიწყო. შეიქმნა დასახმარებელი ფონდიც, სადაც მომღერლის კოლეგები და მეგობრები მონაწილეობდნენ. თუმცა სამწუხაროდ მისი ჩამოყვანა ვერ მოესწრო.
მოისმინეთ ინგა ფერაძის შესრულებით სიმღერა „ბაიათი“
