16 ოქტომბერს თბილისის სახელმწიფო კონსერვატორიამ ჯაზის მიმართულების – ჯაზის საბაკალავრო პროგრამის დაარსების 10 წლის იუბილე აღნიშნა. ამ თარიღთან დაკავშირებით კონსერვატორიის დიდ დარბაზში კონცერტი გაიმართა, რომელმაც ქართველი ჯაზ მუსიკოსების სხვადასხვა თაობა გააერთიანა. მონაწილეთა ძირითად ნაწილს ახალგაზრდა მუსიკოსები – ინსტრუმენტალისტები და ვოკალისტები წარმოადგენდნენ. საღამოს რეზო კიკნაძე უძღვებოდა, რომელმაც მსმენელს მუსიკოსები და მათი პროექტები წარუდგინა.
რეზო კიკნაძე – კომპოზიტორი, პროფესორი:
„თბილისის კონსერვატორიაში ამ მიმართულების შექმნამ დიდი გავლენა მოახდინა ქართული ჯაზის თანამედროვე სცენაზე და ვფიქრობ, ეს დღესაც კარგად გამოჩნდა. ჯაზის სასწავლო მიმართულება კონსერვატორიის პატარა, მაგრამ ძალიან ცოცხალი განყოფილებაა, რომელიც თავისი წიაღიდან მომავალში კიდევ ბევრ ტალანტს და მუსიკალურ ინდივიდუალიზმს გამოუშვებს”
ბექა გოჩიაშვილი, პაპუნა შარიქაძე, დინი ვირსალაძე, სანდრო კვაჭაძე, ნუცი ნებიერიძე, ანა ჟორდანია – ეს იმ არტისტების არასრული ჩამონათვალია, რომლებმაც საიუბილეო კონცერტის პროგრამაში მიიღეს მონაწილეობა.
საღამო ბექა გოჩიაშვილმა დახურა, რომელიც სცენაზე სპეციალურად მოწვეული სტუმრის სტატუსით წარდგა.
ბექა გოჩიაშვილი – მუსიკოსი:
„ჯაზი არის ის, რაც ჩემთვის ყველაზე ძვირფასია და როცა ვხედავ, რომ ჩემს ქვეყანაში ახალგაზრდა მუსიკოსების რაოდენობა იზრდება, ეს ძალიან მაბედნიერებს. ჯაზის სასწავლო მიმართულება უმნიშვნელოვანეს რამეს აკეთებს, რადგან ახალ თაობას ხარისხიან მუსიკას აზიარებს და შესაბამის განათლებას აძლევს. ამ ათმა წელმა თავისი კვალი დატოვა და დღევანდელ კონცერტზე ეს დავინახეთ. მიხარია, რომ მეც მისი ნაწილი გავხდი.”
კონცერტი ოთხ საათზე მეტხანს გაგრძელდა და მისი პროგრამა საკმაოდ მრავალფეროვანი იყო. გამორჩეული იყო სანდრო კვაჭაძის ნომერი, რომლის ფარგლებშიც არტისტმა მისი მუსიკალურო ხელწერისათვის დამახასიათებელი ექსპერიმენტული ნამუშევარი წარმოადგინა.
კონცერტის ერთ-ერთი ნაწილი ჯაზის მიმართულების პროფესორების დაჯილდოებას დაეთმო. ზურა რამიშვილს, რეზო კიკნაძეს, პავლე კვაჭაძეს და მერაბ ოძელაშვილს სპეციალური სიგელები გადაეცათ.
