ადელი Friends-ის მსახიობის მეთიუ პერის გარდაცვალებას ეხმაურება და მას პატივს მიაგებს. ბრიტანელმა მომღერალმა ლოს ანჯელესის კონცერტი შეაჩერა პერის გასახსენებლად, რომელიც 28 ოქტომბერს 54 წლის ასაკში გარდაიცვალა. მსახიობი საკუთარი სახლის აბაზანაში გარდაცვლილი იპოვეს.
„ეს პერსონაჟი მთელი ცხოვრების განმავლობაში მემახსოვრება,” – თქვა ადელმა ჩენდლერის გმირზე, რომელსაც პერი განასახიერებდა. „ის ალბათ ყველა დროის საუკეთესო კომედიური პერსონაჟია.”
ადელმა, რომელიც ჰელოუინისთვის მორტიშა ადამსის ფორმაში იყო გამოწყობილი, სიმღერა When We Were Young სწორედ პერის მიუძღვნა.
„ეს ყოველთვის ისეთი შოკია, მით უმეტეს ადამიანზე, რომელიც მუდამ გაცინებდა და შენს ცხოვრებაში ამდენი სიხარული შემოჰქონდა. რეალურად კი მას არ იცნობდი. ეს ძალიან უცნაურია, მე მას არასდროს შევხვედრივარ. ჩემი ერთ-ერთი საყვარელი მოგონებაა, როცა პატარა ვიყავი, 12 წლის და ჩემი მეგობარი ენდრიუ ჩენდლერის საუკეთესო პაროდიას აკეთებდა ჩვენს გასაცინებლად. და თუ ვინმეს ცუდი დღე ჰქონდა, ან ცუდად გრძნობდა თავს, ის მუდამ ჩენდლერს განასახიერებდა. ეს პერსონაჟი მთელი ცხოვრება მემახსოვრება.”
ადელი, რომელმაც ცოტა ხნის წინ განაცხადა, რომ ალკოჰოლის სმას თავი დაანება, პერის ნივთიერებაზე დამოკიდებულების პრობლემასაც შეეხო. „ის ძალიან გულახდილი იყო მისი პრობლემების შესახებ, რაც, ვფიქრობ, რომ საოცარი სიმამაცეა. უბრალოდ მინდა ვთქვა,თუ რამდენად მიყვარს ის, რაც მან ჩვენთვის გააკეთა და განსაკუთრებით, რაც ჩემთვის გააკეთა… იმედია ახლა მშვიდად განისვენებს.”
ნახეთ ადელის მიმართვა:
