სელენა გომესის ბრენდი Rare Beauty ღაზის სექტორში მიმდინარე მოვლენებს გამოეხმაურა და საქველმოქმედო აქტივობაში ჩაერთო. თავის მოვლის და დეკორატიული კოსმეტიკის ბრენდის ინსტაგრამის გვერდზე განცხადება გამოქვეყნდა, რომლის თანახმადაც კომპანია ღაზის სექტორში დაზარალებული ადამიანების დასახმარებელ საქველმოქმედო ფონდებს ფინანსურ დახმარებას გადასცემს.
„ჩვენ შეძრული ვართ სურათით, რომლებსაც შუა აღმოსავლეთში ვხედავთ. ისრაელის საჰაერო შეტევის შედეგად ათასობით უდანაშაულო მოქალაქე დაიღუპა და მილიონობით ადამიანს იძულებით გადაადგილება მოუწია. ისინი საკვების, წყლის, მედიკამენტებისა და გადარჩენისათვის აუცილებელი რესურსების გარეშე დარჩნენ. მათგან უდიდესი ნაწილი ბავშვები არიან. პალესტინის მოქალაქეები დაცული უნდა იყვნენ.“ – ვკითხულობთ Rare Beauty-ის განცხადებაში.
ბრენდი გამოქვეყნებულ პოსტში აფიქსირებს პოზიციას, რომ ანტისემიტიზმის და ისლამოფობიის ყველა ფორმას ემიჯნება. განცხადებაში განმარტებულია, რომ Rare Beauty დონაციით უერთდება წითელი ჯვრის/წითელი ნახევარმთვარის საზოგადოებებს. „დონაციის სახით თანხას ასევე გადავცემთ UNICEF-ს, რომელიც ღაზის სექტორში მცხოვრებ ბავშვებს მედიკამენტებითა და აუცილებელი რესურსით ამარაგებს“ – წერია Rare Beauty-ის პოსტში. განცხადებაში მენტალური დახმარების აუცილებლობაზეც არის ხაზგასმული.
31 ოქტომბერს სელენა გომესმა განაცხადა, რომ სოციალური მედიისაგან დროებით შესვენებას იღებს. მიზეზად ის ძალადობისვე გარემო დაასახელა, „რამაც მსოფლიო მოიცვა“.
