Billboard-ი ერთ-ერთი ყველაზე გავლენიანი გამოცემაა, რომელიც განსაკუთრებით ცნობილია მისი მუსიკალური ჩარტებით. დღეიდან კი Billboard-ის ჩარტები ხელმისაწვდომი Billboard საქართველოს მკითხველისთვისაც იქნება. ყოველ კვირას ჩვენს პლატფორმაზე Billboard-ის ორი ყველაზე მნიშვნელოვანი ჩარტი: Billboard Hot 100 და Billboard 200 გამოქვეყნდება.
Billboard-ის ჩარტები სათავეს ჯერ კიდევ 1913 წლიდან იღებს, როცა პირველი ჩარტი გამოქვეყნდა სახელწოდებით Last Week’s Ten Best Sellers Among The Popular Songs. გაყიდვების მიხედვით პირველი პოპჩარტი კი გამოცემამ 1936 წელს გააკეთა სახელწოდებით Ten Best Records for Week Ending, რომელშიც სამი ხმის ჩამწერი კომპანიისგან მოწოდებული 10 ყველაზე გაყიდვადი კომპოზიცია შედიოდა.
დღეს Billboard-ს 50-ზე მეტი ჩარტი აქვს სხვადასხვა ჟანრისა და მიმართულების მიხედვით. თუმცა მათ შორის ყველაზე მნიშვნელოვანია ჩარტები: Hot 100, რომელშიც ყველა ჟანრის 100 საუკეთესო კომპოზიცია შედის და ერთგვარად საბაზისო ჩარტსაც წარმოადგენს და ასევე Billboard 200, რომელიც ალბომების რეიტინგს ასახავს. სწორედ ამ ორ ჩარტს შემოგთავაზებთ დღეიდან Billboard საქართველოს პლატფორმაზე. ჩარტები ყოველკვირეულად განახლდება.
