„რესპუბლიკის“ სცენაზე 1 იანვარს Billboard Georgia Stage-ის კონცერტი გაიმართა, სადაც მსმენელის წინაშე TAMADA წარდგა. სპეციალური სტუმარი გიორგი მიქაძე გახლდათ.
TAMADA 2020 წელს ლაშა ჩხაპელიას მიერ შექმნილი მუსიკალური პროექტია, რომელმაც მსმენელის ყურადღება და სიყვარული მალევე დაიმსახურა. სოციალური, სატირული და რომანტიკული ტექსტები პროექტ TAMADA-ს ავთენტური და გამორჩეული მიგნებაა, რომელიც მის შემოქმედებას ამდიდრებს და განსხვავებულს ხდის.
„დღეს გპირდებით, რომ განსაკუთრებულ რაღაცებსაც შემოგთავაზებთ… გისურვებთ წარმატებებს, ერთმანეთის სიყვარულს, გაფრთხილებას, გაგებას, სამოქალაქო პასუხისმგებლობას.“ მიმართა TAMADA-მ სცენიდან აუდიტორიას.
TAMADA-მ კონცერტზე კარგად ნაცნობ სიმღერებთან ერთად ახალი კომპოზიციები მისთვის სახასიათო იმპროვიზაციით შეასრულა და აუდიტორიაც აიყოლია. მუსიკოსის ერთ-ერთი ყველაზე გამორჩეული ნამუშევრებია Piramde და „შიში,“ რომელთაც Youtube-ზე მილიონობით ნახვა აქვს.
საღამო Machaidze dj სეტით დასრულდა.
აღსანიშნავია, რომ პროექტი Billboard Georgia Stage – Live კონცერტების სერიაა, რომელსაც Club Iveria და „სილქნეტი“ წარადგენს. Tamada-ს ლაივი პროექტის ფარგლებში გამართული მეხუთე კონცერტი იყო. Billboard Georgia Stage-ის მუსიკალური საღამოების სერია გრძელდება პროექტის ფარგლებში 13 იანვარს, „რესპუბლიკა ივენთ ჰოლის“ სცენაზე San & Band წარდგება.
