12 იანვარს „რესპუბლიკა ივენთ ჰოლის“ სცენაზე Billboard Stage-ის მუსიკალური სერიების ფარგლებში ბრიტანელი მუსიკოსი, ROUTE 94 წარდგა.
ROUTE 94, იგივე Rowan Jones მსოფლიო მუსიკალური სამყაროსთვის განსაკუთრებით ცნობილი თავისი ჰიტით – My Love გახდა, რომელიც ბრიტანეთის მუსიკალური ჩარტების სათავეში არაერთხელ მოხვდა. 30 წლის მუსიკოსის აქტიური შემოქმედებითი მოღვაწეობა დაახლოებით 10 წელზე მეტია გრძელდება. არტისტმა სხვადასხვა დროს მსოფლიოს გარშემო არაერთი მასშტაბური ლაივი გამართა. მექსიკა, მაიამი, ამსტერდამი, სიდნეი, იბიცა – ROUTE 94-ს მსოფლიოს მრავალ წამყვან კლუბში დაუკრავს.
ROUTE 94-ის ლაივმა „რესპუბლიკა ივენთ ჰოლსი“ ასეულობით მსმენელი გააერთიანა. არტისტმა მრავალფეროვანი პროგრამა წარადგინა, რომელიც სხვადასხვა პერიოდში შექმნილ ტრეკებს მოიცავდა.
მუსიკალური საღამოს დაწყებამდე „Billboard საქართველომ” ROUTE 94-თან ინტერვიუ ჩაწერა. არტისტმა თავის შემოქმედებით კარიერასა და მუსიკალურ ინსპირაციაზე ისაუბრა.
ROUTE 94:
„მე მუსიკის გარემოცვაში გავიზარდე. დედაჩემი მუსიკის დიდი თაყვანისმცემელი იყო. ის ყველა ჟანრს უსმენდა, ამიტომაც შესაძლებლობა მქონდა, ადრეული ასაკიდანვე გავცნობოდი სხვადასხვა ჟანრს. წლებთან ერთად გამიჩნდა სურვილი, საკუთარი თავი მუსიკოსის ამპლუაში მომესინჯა, რაიმე მეც შემექმნა და დღეს აქ ვარ.”
როგორც უკვე აღინიშნა, ტრეკმა My Love არტისტის მუსიკალურ კარიერაში დიდი როლი ითამაშა. როგორც ROUTE 94-მა ჩვენთან საუბრისას თქვა, ამ ტრეკის ინსპირაცია წლების განმავლობაში დაგროვილი მუსიკალური გამოცდილება და შინაგანი ემოციების ერთიანობა იყო.
ROUTE 94:
„ამ ტრეკმა ბევრი რამ შეცვალა. მუსიკას ძირითადად საკუთარ სახლში მოწყობილ სტუდიაში ვქმნიდი და უცებ გამოვეცი ტრეკი, რომელიც გლობალური ჰიტი გახდა და ყველგან ისმოდა. ეს ნამდვილად მოულოდნელი და გასაოცარი იყო. ამავდროულად, ეს გარკვეულ პასუხისმგებლობადაც იქცა და ჩემი კარიერის მიმართულება შეცვალა.”
არტისტის თქმით, მუსიკა მისთვის საკუთარი თავის, ემოციების, შეგრძნებების გამოხატვის საშუალებაა. სწორედ ამიტომ, სცენაზე გამოსვლას და მსმენელთან კონტაქტს განსაკუთრებული ემოციური მნიშვნელობა აქვს.
ROUTE 94:
„მიზეზი, რატომაც მუსიკას ვქმნი, არის ის, რომ ადამიანები გავაბედნიერო. მუსიკა ის ენაა, რომლის მეშვეობით მსოფლიოს ნებისმიერ ადგილას შეგიძლია, ადამიანებს ესაუბრო, რადგან მუსიკა უნივერსალური საკომუნიკაციო ენაა.”
ღონისძიება საქართველოს კულტურის ცენტრის ორგანიზებითა და ქალაქ თბილისის მერის მხარდაჭერით გაიმართ. როგორც უკვე აღვნიშნეთ, Route 94-ის კონცერტი „Billboard საქართველოს” სცენის მუსიკალური სერიის ფარგლებში ჩატარდა.
მოუსმინეთ ROUTE 94-ის ტრეკს – MY LOVE:
