თამადამ ახალი კომპოზიცია გააზიარა სახელწოდებით In Vino Veritas. სიმღერა პირველი ტრეკია ახალი EP-ის, რომელიც ქართველი მუსიკოსისა და გერმანელი პროდიუსერის – Iori-ს ერთობლივი ნამუშევარია.
„ასეთ მუსიკას, როგორიცაა In Vino Veritas, ხუმრობით „საინფორმაციო მუსიკას” ვეძახი. Რომ ვფიქრობდი, რაზე მემღერა, გადავწყვიტე, რომ ეს ყოფილიყო თამადის პატარა ქანდაკება და რეალურად მასზე ვმღერი. ჩემს ახალ ალბომშიც შედის, მაგალითად, ერთი სიმღერა ბონუს ტრეკად, ასე ვთქვათ, რომელიც არის თრიალეთის თასზე. საინფორმაციოს მაგიტომაც ვეძახი, რომ ამ არტეფაქტებზე ვმღერი. თან მეტაფორულიცაა.
Რაც შეეხება თვითონ EP-ის, Iori არის ჩემი საყვარელი პროდიუსერი. გერმანიაში რომ ვცხოვრობდი, ხშირად ვუსმენდი ხოლმე. ჩემი პირველი ალბომის მასტერინგიც მან გააკეთა. ნელ-ნელა დავახლოვდით, თბილისშიც იყო ჩამოსული დასაკრავად და ბოლოს გადავწყვიტეთ, რაღაც ერთობლივი გაგვეკეთებინა. ეს არის EP, რომელშიც შედის სამი კომპოზიცია. ერთი ჩემია – In Vino Veritas, ერთი Iori-ს – Italian Devine, ხოლო მესამე არის ჩვენი საერთო სიმღერა, რომელსაც ჰქვია „გული ნათელი” და რომელშიც, სხვათა შორის, Iori ქართულად მღერის. EP-საც ამ ტრეკის სახელი – „გული ნათელი” დავარქვით.”
„გული ნათელის” მეორე კომპოზიცია, Iori-ს შესრულებით, 2 თებერვალს გამოვა, ხოლო ქართველი და გერმანელი მუსიკოსების საერთო და EP-ის ბოლო სიმღერა კი – 9 თებერვალს. ამას გარდა, თამადამ უკვე დააანონსა ახალი სოლო ალბომის გამოცემაც, რომელიც Leno Records-ში ჩაიწერა. ალბომი გაზაფხულზე გამოვა.
