27 იანვარს, კლუბში Mtkvarze მსმენელის წინაშე Killages წარდგება. ჯგუფის კონცერტი კლუბის ლაივების სერიის ფარგლებში ტარდება. აღსანიშნავია, რომ ეს ლაივები იმ მუსიკალური გამოცდილების კონცეფციას ცდება, რომელიც მსმენელისათვის საკლუბო სივრცესთან ასოცირდება.
როგორც კლუბის წარმომადგენლები „Billboard საქართველოსთან” საუბრისას ამბობენ ამ სივრცისათვის მუსიკალური მრავალფეროვნება ყოველთვის მნიშვნელოვანი და მსგავსი ლაივებიც ვენიუს 12 წლიანი ისტორიის განუყოფელი ნაწილია. სწორედ ამან განაპირობა ის, რომ კლუბის სივრცეში არაერთხელ მოვისმინეთ ჟანრობრივად განსხვავებული არტისტების კონცერტები.
„ბოლო წლებში ქართულ სცენაზე საინტერესო ბენდები გაჩნდნენ, რომლებიც დიდ კონცერტებსაც მართავენ, თუმცა ასეთი ბენდებისთვის შედარებით მცირე ზომის დარბაზში დაკვრა, სადაც უნიკალური Danley Sound Labs ხმის სისტემაა, მსმენელთან კიდევ უფრო მჭიდრო კავშირის დამყარების საშუალება და განსაკუთრებული გამოცდილებაა.”
Killages ლაივამდე სეტს დაუკრავს ქართული ალტერნატიული მუსიკალური სივრცის გამორჩეული შემსრულებელი, IAMNIKITA.
„Killages და IAMNIKITA ქართული სცენის ძალიან საინტერესო და მნიშვნელოვანი წარმომადგენლები არიან, ნიკიტას უკვე ჰქონდა ლაივი ჩვენთან, ახლა კი კონცერტამდე მუსიკალურ სელექციას შემოგვთავაზებს.” – აღნიშნავენ კლუბის წარმომადგენლები.
ლაივის შესახებ მეტი ინფორმაციისათვის იხილეთ ბმული.
