„ჯეიმს ბრაუნის გარეშე კულტურის ტრაექტორია შეიცვლებოდა” ასეთი შეფასება ისმის ბრაუნის შესახებ გადაღებულ სერიალში, რომლის პირველი ნაწილის პრემიერა 19 თებერვალს, ტელეარხ ET-ზე შედგა. James Brown: Say It Loud – ასე ჰქვია სერიალს და მისი მეორე ნაწილი მაყურებელმა 20 თებერვალს იხილა.
სერიალის პრემიერამდე ბრაუნის აქამდე უცნობი სიმღერა, We Got to Change გამოქვეყნდა. სიმღერა 1970 წლის 16 აგვისტოს, მაიამის ერთ-ერთ სტუდიაში ჩაიწერა.
რაც შეეხება დოკუმენტურ სერიალს, James Brown: Say It Loud რეჟისორმა დებორა რაილი დრაპერმა გადაიღო. ფილმი მაყურებელს ბრაუნის ცხოვრებასა და წარმატების გზის შესახებ უყვება. ბრაუნის პერსონა ნაჩვენებია ხელოვანის, ბიზნესმენის და სამოქალაქო აქტივისტის ამპლუაში. სერიალი ეხება პრეზიდენტ ნიქსონისათვის გამოცხადებულ ღია მხარდაჭერას, ასევე ნარკოტიკების მოხმარებისა და ქალებზე ძალადობის მძიმე ისტორიებსაც.
სერიალი სხვადასხვა სფეროს წარმომადგენლების ინტერვიუებს მოიცავს. მათ შორის არიან არტისტები, პროდიუსერები, სიმღერების ავტორები. დოკუმენტურ ნამუშევარში ასევე ვხვდებით ოჯახის წევრებს, რომლებიც ჯეიმს ბრაუნის შესახებ საკუთარი პერსპექტივიდან საუბრობენ.
ინტერვიუებთან ერთად, მაყურებელმა ძველი ვიდეო ჩანაწერები და საარქივო ფოტო მასალაც იხილა.
