ბოლო დროის ერთ-ერთი ყველაზე ცნობილი ქართული პოსტ-პანკ ბენდი SKAZZ 2021 წელს შეიქმნა, მისი წევრები კი საბა ვაშაყმაძე (ვოკალი), ნოდო კუპრავა (გიტარა) და ბაქარ გუჯეჯიანი (დრამი) არიან, თუმცა ახალ ალბომზე მუშაობის პროცესში ბენდმა გიტარისტი გიგი სარჯველაძე დაიმატა, რამაც მათი თქმით ბენდის მუსიკა კიდევ უფრო გაამრავალფეროვნა.
21 თებერვალს ბენდმა ახალი სიმღერა, SAD KHAR გამოუშვა, რომელიც მათ მომავალ ალბომ ISTERIKA-ში შევა. ალბომი ბენდის მეგობრის ხსოვნას ეძღვნება, რასაც სიმღერის აღწერაშიც ვკითხულობთ: In memory of Jaba.
SKAZZ – საბა ვაშაყმაძე:
„სიმღერა SAD KHAR იმ ალბომში შედის, რომელზეც მუშაობა 2023 წელს დავიწყეთ, ჩვენი მეგობარი ჯაბას გარდაცვალების შემდეგ და ეს სიმღერა, როგორც მთელი ალბომი, მის ხსოვნას მივუძღვენით. სიმღერების ნაწილი დიდი ხნით ადრე გვქონდა დაწერილი და თაროზე შემოდებული, ვაპირებდით რომ, როცა პოსტ-პანკს ცოტა ალტერნატიულ როკს და გრანჟს შევურევდით ეს სიმღერები ალბომის სახით მაშინ გამოგვექვეყნებინა. Ალბომში შესული ორი სიმღერა წლების წინ ჯაბას პირადად მოვასმენინე და მაგრად მოეწონა, თვითონაც ალტერნატიული როკის და გრანჟის მსმენელი იყო, ამიტომ ჩვენს ამ იდეას ყოველთვის გულშემატკივრობდა. როცა წავიდა, გადავწყვიტეთ, ამ ალბომზე მუშაობა აქტიურად დაგვეწყო და გავაკეთეთ ჩაწერები, შევამატეთ სხვა სიმღერებიც, ალბომზე მუშაობის პროცესში ჯგუფში ჩვენი მეგობარი, გიტარისტი გიგი სარჯველაძე დავიმატეთ, რამაც მუშაობის პროცესი ბევრად საინტერესო გახადა. გარდა ამ ალბომისა, მისმა დამატებამ ძველ სიმღერებსაც ახალი სიცოცხლე შესძინა.“
პირველი ტრეკი, SAD KHAR, უკვე გამოვაქვეყნეთ Youtube-ზე და ვაპირებთ, რამდენიმედღიანი ინტერვალით სხვა სიმღერებიც ავტვირთოთ, შემდეგ კი მთელ ალბომს სპოტიფაიზე დავდებთ. ვგეგმავთ ვიდეოებზეც მუშაობას რამდენიმე ახალი სიმღერისთვის. ალბომი მთლიანობაში 10 სიმღერას მოიცავს.
უახლოეს მომავალში ბენდი ქვეყნის გარეთ ტურნესაც გეგმავს და აპრილის დასაწყისში უკრაინასა და პოლონეთში გამართავენ კონცერტებს:
“2023 წლის ბოლოს უკრაინულმა ბუქინგ კომპანია Pink Hearts-მა ტურნეში მიგვიწვია, რომელიც 2024 წელს, აპრილის დასაწყისში აიღებს სტარტს. ტურნეს ფარგლებში კონცერტებს გავმართავთ უკრაინასა და პოლონეთში. უკრაინაში დავუკრავთ ლვოვში, ოდესაში და კიევში, ხოლო პოლონეთში ერთ კონცერტს გავმართავთ ვარშავაში. მასპინძლები წინასწარ გვამზადებენ ოდესაში მოსალოდნელი საფრთხისთვის, თუმცა ამ ეტაპზე ეს ფაქტი უფრო გვიმძაფრეს იქ ჩასვლის სურვილს. მაისის თვეში კი ვგეგმავთ იტალიაში დაკვრას, ამაზე დეტალურ ინფორმაციას მალე გამოვაქვეყნებთ.“
მოისმინეთ SKAZZ -ის ახალი სიმღერა SAD KHAR:
